Mayweather-a lo kir dawn

Weight division pangaa world champion lo ni tawh Floyd Mayweather chuan ring chhung a rap leh dawn ta a, February 2021 khian YouTuber Logan Paul nen 'special exhibition' ah an inhmachhawn dawn. 

Kum 43 mi Mayweather hian a career chhung zawngin vawi 50 inhnek a hmachhawn a, tlawm a nei miah lo. Kum 2017 khan a fight hnuhnung berah MMA star Conor McGregor-a hmachhawn a, boxing chanchina sum tamna ber pawl fight a ni. 

Mayweather hmachhawn tur Paul hi kum 25 mi chauh a la ni a, mahse American YouTuber hian professional fight vawi khat chiah a la hmachhawn - amah ang thoa YouTube hmanga lar KSI lakah November 2019 khan a tlawm. 

Paul leh Mayweather-te hi social media kaltlangin vawi tam an lo inrumṭhaih tawh a, inhnek hmuhnawm tak erawh beisei a harsa ang. Paul-a unaupa, YouTuber ve tho Jake Paul chu kar hmasa lawk khan Mike Tyson vs Roy Jones Jr exhibition match-ah khan inlan vein NBA player hlui Nate Robinson a hneh. 

December 2018 khan Mayweather hian exhibition boxing-ah Japanese kickboxer Tenshin Nasukawa chu second 140 chhungin a lo hneh tawh a, pound maktaduai 6.7-a hlawh chhuak.