Conte-a hoin Napoli an sang

Antonio Conte enkawl Napoli chuan Serie A hmahruaitu an nihna an sawhnghet zel. Inrinni zan khan Naples club hian Giovanni Di Lorenzo-a goal khat hmangin Lecce chu 1-0 in an hneh.

Napoli hian Serie A match vawi kua an khelh aṭangin point 22 an hmu, anmahni hnaih bertu Inter Milan aiin point ngain an sang zawk - Inter hian an khelh hma bakah hnehna chang pawh ni se an umphak thei rih lo a ni.

Italian manager Conte chuan, "Ball kan chang hnem a, goal khung theihna remchang ṭha pawh kan insian hnem hle. Kan khingpui khan goal ven an thiam em em a, mahse kan goal nawr dan kha a fuh ve bawk.

"A chang chuan hnehna chan nan hian goal khat lek khung a tawk chang pawh a awm, chutiang match chu Lecce lakah khan kan hmu," tiin a sawi a, nizan a Inter Milan leh Juventus inkhel chu hmuhnawm thlira a lo thlir tur thu a sawi bawk a ni.