Kohhran hrang hrang thawhhona tur pawl Council of Churches in Mizoram a ding ta

Mizorama kohhran pariatte thawhhona tur Council of Churches in Mizoram (CCM) chu nimin khan hawn a ni ta a, October 26, Inrinni khan rorel inkhawm neih a ni.

CCM Hawnna Inkhawmpui hi Inrinni chhun dar 12:30 hian Mission Veng Kohhran biak-inah ṭan a ni a, CCM Joint Committee chairman Rev. R Vanlalnghaka, Mizoram Synod moderator kaihhruaiin rorel niin, rorel palai tura ruat 552 aṭangin mi 521 an tel.

Rorel Inkhawmah hian CCM hruaitu - office bearer pasarih leh committee member atana ruat mi 50-te pawm a ni a; Champhaia headquarters nei Zomi Baptist Church-in CCM-a tel an dilna chu pawm a ni. October 2024 - March 31, 2025 chhunga CCM budget atan Rs 32,40,000 pawm a ni a, budget hi kohhran pariatte'n an thawh khawm ang.

Kohhran tinte sum thawh zat tur chu - Mizoram Presbyterian Kohhran Rs 12,00,000, Mizoram Baptist Kohhran Rs 8,00,000, Evangelical Church of Maraland Rs 3,50,000, Lairam Isua Krista Baptist Kohhran Rs 3,00,000, Evangelical Free Church of India Rs 2,50,000, Independent Church of India Rs 2,00,000, Wesleyan Methodist Church of Mizoram Rs 1,00,000 leh Isua Krista Kohhran (Bualpui Ng) Rs 40,000 a ni.

Nimin Pathianni chawhma inkhawmah CCM hruaitu tharte lak luhna hun hman a ni a, CCM thuthlung chhiar rual a ni. Chief minister Lalduhoma leh North East India Christian Council general secretary Rev. Dr Ramengliana ten thuchah (greetings) an sawi.

CCM Hawnna Inkhawmpuiah hian rorel palai mi 552 ruat an nih bakah, Aizawla kohhran hrang hrang aṭangin palai 1,300 vel ruat an ni a, nizan khan mi 2,000 vel an inkhawm. Nimin chawhmaa inkhawm chhimtu zingah MLA 26 an tel a ni.

CCM OFFICE BEARER-TE
President : Rev. Dr R Lalbiakliana; BCM
Vice President : 1) Rev. B. Zazawna Lai; LIKBK
2) Rev. Lalrodinpuia LS Nghaling; IKK (Bualpui Ng)
General Secretary : Rev. Dr Lalhmangaiha; PCI (full time)
Joint Secretary : Rev. T Salaw; ECM
Treasurer : Upa R Lalmalsawma; PCI
Finance Secretary : Rev. Jessai L Neitham; EFCI