March thla laihawlah Australian GP beisei

Formula 1 Australian Grand Prix chu coronavirus vangin tun season atan neih theih a ni lo a, season thar lo awm leh turah erawh nakkum March thla laihawl hian neih theih ngei an beisei.

Kumin khan Melbourne khawpuiah a hmuna entu awm ngeiin inelna neih an tum ruh viau, team tam zawk pawh a hmun puiah an thleng hman. Mahse McLaren team zinga miin hri a lo kai avangin chawpchilh takin an ṭhulh leh hnuhnawh.

F1 thuneitu lamin season thar calendar an la ti chhuak lo a, kumina an tlan theih lohna hmun ṭhenkhat atan hian ruahmanna an siam dawn em tih a la chiang lo. Chinese bakah Vietnam GP pawh an tlan thei lo a ni.

Australian GP Corporation chairman Andrew Westacott chuan, "Tun hma lama kalphung pangngai angin Melbourne khawpui chuan inelna khuhhawnna a thlen leh ngei kan ring," a ti.

F1 chairman leh chief executive ni bawk Chase Carey-a'n season tharah chuan calendar pangngai an hman theih tawh a beisei thu a sawi a, thuneitu lamin an lo sawi fo tawh angin intlansiak hi a tam thei ang ber an neih a rinawm.

Kuminah hian hri leng vangin beisei leh tum angin inelna an nei mumal thei lo, season ṭan tlai deuh mah se a tam thei ang ber chu intlansiak an tum. Hmun ṭhenkhatah chuan a hmuna entu awm chungin an tlan thei leh tawh a ni.