Wimbledon 2021 khelh ngei an tum

Tennis tournament upa ber Wimbledon chu kuminah khelh theih ni lo mah se nakkumah chuan neih ngei an tum, chutih rualin tournament hi a hmuna entu awm loa khelh mai pawh ngai thei dinhmunah a la ding.

Harsatna vawr tawp a thleng a nih ngawt loh chuan Wimbledon hi an ṭhulh ngai lo, kuminah hian Indopui pahnihna hnua a vawi khat nan an khel thei lo leh chauh, coronavirus vang hian grass court inelna an nei lo vek a ni.

Inelna buatsaihtu All England Club chuan thu chhuah siamin, "Season tharah pawh player, coaching team, staff leh mipui himna kan ngai pawimawh leh dawn, chutih rualin tournament erawh khelh theih a nih ngei kan beisei hle.

"Hriselna lama mi thiamte leh tualchhung thuneitu lam nen inbiakna kan nei reng a, hri leng hian eng tiangin nge min nghawng dawn tih chu kan la zirchiang reng. Tuna kan hmuh chinah chian chanchin ṭha lam a ni," an ti.

Wimbledon khel lo mah se kuminah hian Australian Open leh French Open chu a hmuna entu awmin an khel, Paris khawpuiah hian entu awm mah se an tam lo thung. US Open erawh entu nei loa khelh zawh a ngai, hri leng hian season thar pawh a la nghawng dawn niin a lang.