Chelsea squad-ah Cech

Chelsea-in 2020-21 season Premier League squad-ah football khelh chawlhsan tawh goalkeeper Petr Cech an telh. Kum 38 mi Cech hian 2018-19 season khan football khelh a chawlhsan a, tunah hian Blues tan technical and performance adviser a ni mek.

London club hian tun season-ah Rennes aṭangin keeper Edouard Mendy an lalut a, khawvela keeper manto ber Kepa Arrizabalaga leh kum 39 mi Willy Caballero an nei sa. Goalkeeper pathum bakah hian Under 21 keeper Karlo Ziger te an la kawl a, Cech an ziak lut hian mak tih a hlawh hle.

Chelsea manager Frank Lampard chuan, "Chanchin ngaih-nawm atan ringawta ti kan ni lo. Cech hian training nuam a ti em em a, kan duh miah loh beisei miah loh thil hi thleng ta se, chutiang hun atan chuan a ni. Thla sarih liam taa thil thleng kha thlir kir ila, khawvel beisei lawk loh a thleng," tiin Cech an dahluh chhan a 

sawi fiah.

Arsenal-in kum 2013-a pound maktaduai 42.4-a an lakluh Mesut Ozil squad-ah an dah lo a, German midfielder hian March 7 hnuah Gunners tan a la inlan leh lo. Gunners hian Greece defender Sokratis Papastathopoulos an tel lo bawk.

Ozil hi Europa League squad-ah telh a nih tawh loh bawk avangin kum 2021 nipuia a contract tawp hmain Arsenal Under 23 tan chauh a khel thei tawh tihna a ni. Nakkuma squad an siksawi huna an telh a nih erawh chuan season chawhnu lam atan hun a la inhanwg thei ang.

Manchester United-in kumin February thlaa contract an pawhsei sak Phil Jones leh goalkeeper Sergio Romero te an telh lo.