Barca leh Juve an chak - an intawng thuai dawn

Spanish La Liga a an match hnuhnung bera chak zo lo Barcelona-in an insiamṭha lehnghal tih pholangin Champions League group stage-ah nuamsa takin an chak a, mikhual Ferencvaros chu 5-1 in an sawp. 

Barcelona tan Lionel Messi (penalty), Ansu Fati,  Philippe Coutinho, Pedri leh Ousmane Dembele-ten goal khat ṭheuh an khung a, Gerard Pique chu hnawhchhuah a ni thung. 

Pique hi hnawhchhuah a nih bakah penalty a chawi tel a, Ihor Kharatin chuan Hungarian club tana goal awmchhun a khung theih phah - October 28 zana Juventus an lenchilh hunah Pique hi a inlan thei lo ang. Barca hian Juve an lenchilh hmain La Liga-ah El Clasico khel turin Inrinni zan khian Real Madrid an lenchilh dawn a, fixture hautakin a hmuak. 

Juventus hian group G inkhel dangah Dynamo Kiev chu 2-0 in an hneh a, Covid-19 kai vangin Cristiano Ronaldo inlan thei lo mah se Alvaro Morata chuan a hna ṭha taka thawkin goal hnih a khung - Juve hian Barca an mikhual hmain Serie A-ah Pathianni zan khian Verona an mikhual dawn a, Barca aiin fixture a hautak lo zawk. 

Nipui transfer a Barcelona chhuahsan tuma thawm nei Messi-a'n court a club khin a duh loh vang chauhin a puanthuah a tel lo a, Argentine forward hian season dang angin a rilru a pe tawk lo em ni chu aw, tih turin goal khung a harsat. 

Getafe laka rin loh taka 1-0 a an tlawm zawh hnuah Barca coach Ronald Koeman pawhin a captain hi tun aia ṭha zawka khel thei a nih thu a sawi a, Dutch coach hian Messi 'tak tak' a la hmu loah a inngai. 

Messi hian Ferencvaros lakah goal a khung ta ngei a, mahse tun season a club tana a goal hnihna hi a goal hmasa ang thoin 'penalty' a ni - hetihrual hian penalty erawh a hlawhchhuah a ni a, Dembele khung tur a assist bawk. 

Kum 33 mi forward hian Champions League season 16 chhung chu a zawnin goal a khung ta a, European club football inelna sang bera season 16  goal khung thei record Manchester United legend Ryan Giggs-a'n a lo chelh tawh chu a nihrual.

Messi a khel ṭha a, Argentine forward a khelh ṭhat phawt chuan Barca an khel ṭha ṭhin - Koeman tana lawmna tur langsar pakhat chu Messi piah lama Brazilian midfielder Coutinho, Fati, Pedri leh Dembele-ten goal an khung hi a ni. 

Koeman rawih a nih hmaa Barca chhuahsan tur anga thang hman Coutinho hian minute 52-naah an goal thumna a khung a, tun season-ah match nga khel tawhin goal hnih leh assist pahnih a nei fel ta der.

Coutinho goal khung tur siamsaktu Fati-a'n assist a neih hmain an goal hnihna a khung a, kum 17 mi rawlthar duhawm hian match ngaah goal li khungin assist vawi hnih a nei fel ta der - amah thlaktu kum 17 mi Pedri chuan goal a rawn keng tel bawk. 

Nipui transfer a Las Palmas aṭanga Barca pantu attacking midfielder tan club tana a goal hmasa ber a ni - Liverpool leh United nena sawi zawm hlawh hman Dembele pawhin theihna sang tak a la nei reng tih pholangin an goal ngana a khung a, tun season-ah match thum khelin goal khat leh assist vawi khat a nei ta. 

Juventus-in an thiampuipa Ronaldo an chhawr thei lo a, harsatna erawh an tawh phah lo - Morata an nei tlat. Nipui transfer a loan a khel tura a club hlui Juve lama kir forward hian a class pholangin goal hnih ṭha tak a khung. 

Kum 27 mi striker hian Ronaldo hmun ruaka luhtir Dejan Kulusevski-a shot per chu chang fuhin goal-ah a chantir a, he goal khung tura a awmna tur hmun taka a lo awmna leh chet ranna chu fak tlak a ni. Morata hian a duhtawk mai lo. Minute 84-naah an goal hnihna a khung leh a, striker tur renga duan a ni tih pholangin  Juan Cuadrado siamsak chu  a tauh lut. 

Spanish striker hian Juve lama a kir hnuah match thum khelin goal thum a khung tling ta a, Juve tana a khelh hmasaka a hlawhtlinna nen chhutin Italian club nen hian inkawp tur renga duan emaw tih mai tur an ni. 

Juve an chak a, thil danglam tak a awm thung - Dynamo Kiev coach Mircea Lucescu khan Brescia a enkawl laiin kum 16 mi Pirlo chu 1995 khan a professional match hmasa ber a khelhtir a, Pirlo-a'n coach nichunga Champions League match a hmachhawn hmasak berah a khingpui a ni leh ta chiah. 

Juve defender tawnhriat nei ṭha Giorgio Chiellini chu hliam vanga lakchhuah a ngai a, inkhelh zawhah coach Andrea Pirlo chuan kum 36 mi defender dinhmun hi an zirchian leh phawt tur thu a sawi. 

Hetihlai hian tun season a la inlan miah lo Paulo Dybala chu minute 56-naah luhtir a ni a, Pirlo chuan, "Dybala hi 100% in a la in fit lo a, chumi tur chuan inkhelh tam a mamawh a, a ṭhat dan berin kan hmu thuai ang," a ti.

Argentine forward hliam dam kawr hi kar hmasa Serie A match a Crotone nen 1-1 a an inhnehtawkna inkhelah bench-ah dah a ni a,  Juve director Fabio Paratici nen an inhmuhthiam loh phah hial niin an sawi - Pirlo pawhin a forward hlim loh thu hi a pha lo a, boruak erawh a ṭha ṭan niin a lang. 

Maurizio Sarri hnuaia hmun chang phak lo Aaron Ramsey erawh Pirlo hnuaiah a hmuhnawm chhunzawm zel a, Morata goal hmasa zawk luh theih nana back-heel hmanga Kulusevski hnena ball a pekte chu mawi tak a ni.