Paris Masters khel tur Nadal

Rafael Nadal chuan November 2-8 chhunga khelh tur Rolex Paris Masters-ah a inlan tur thu a tichiang a, tournament hi Paris khawpuia khelh tur ni mah se clay court ni loin hard court a nih avangin a boruak a danglam dawn.

Kum 34 mi Nadal hian a vawi 13 nan French Open nomawi a chawi hlim chauh a ni a, inrintawkna a nei sang hle ang tih a chiang. Paris Masters-ah hian world number 1 Novak Djokovic nen na takin an inel leh tura ngaih a ni.

Grand Slam vawi 20 champion tawh Nadal chuan, "Tunah chuan indoor lama inkhelh hun a ni, Paris Masters khel turin ka inpeih tawh," tiin twitter lamah inkhel tura a inpeh leh tawh thu a sawi a, a inkhelh thiamna khawpui Paris lam a pan leh dawn.

Paris khawpui hi Nadal tan hmun nuam a ni a, mahse tun ṭuma inelna erawh hi chu nomawi a la chawi ngai lohna a ni thung! Serbian tlangval Djokovic erawh nomawi kawl mektu a ni a, ṭum nga ngawt a champion tawh.

Nadal-a'n a elpui Roger Federer chu major title lak hnem lamah a nih rual tawh tawh, an hnungah hian vawi 17 champion tawh Djokovic a awm bawk. Season tharah pawh player ropui pathum hi tennis ti hmuhnawmtu an la nih leh ngei a rinawm.