Premier League Thlirletna Laipui kap puaktu Arsenal an him

Arsene Wenger-a'n a zawna a vawi lina atan first eleven ngai a luhtir leh a, a tisual lo. Alexis Sanchez-a goal hnih leh Aaron Ramsey goal khat hmangin Hull City 3-1 in an hneh. Kum 1996 March-April hnua first eleven thlak loa vawi li a luhzawn tir lehna chiah a ni.

Premier League-ah Chelsea champion tawh mah se Thawhṭanni zan inkhelah tih mai mai a thiang lo. Arsenal hian season tharah qualifying khelh ngai loa Champions League khelh an duh a, an khingpui Hull pawhin Premier League khelh chhunzawm zel turin point thum an mamawh.

Chak zawk Arsenal-in point 70 hmuin Champions League khel turin an him tawh a, anni aia match khata khel tam zawk Manchester City nen point hmuh inzat inangin pathumna an ni mek. Chak lo Hull dinhmun a derthawng a, point 34 chauh la hmuin table-ah 17 na an ni. Relegation zone a awm Sunderland nen an inthlauhna chu point khat chauh a ni.

KC Stadium-ah chuan

Arsenal striker ropui ni ṭhin Thierry Henry-a'n champion pui tham a ni lo tia a lo sawisel Olivier Giroud chu Arsenal tlar hmaah a mal din leh. Ani hian a hun ṭha neih hmasa ber a hmang ṭangkai lo leh a, Alexis Sanchez-a cross ball chu Hull goal sirah a pet chhuak.

Minute 28-naah Gunners-in free-kick an hmu, a pet turin Sanchez a rawn ding chuak. Ani hian Arsenal hmahruaina goal a khung. Hull insiam rem hmain Ramsey a rawn inlar zui nghal a, Cazorla thawhrah sengin minute 33-ah an goal hnihna a thun zui nghal.

Mesut Ozil leh Sanchez ten Hull tlar­hnung an chhaih buai zui a, Ozil goal khung tur chu Hull goalkeeper Steve Harper-a'n a lo dan sak. Arsenal-in an nawr chhun zawm zel, Ramsey through ball ṭha tak chu Sanchez chuan Harper-a dan hman lohin a thun leh a, first half a tawp zui nghal.

Second half-ah Ahmed Elmohamady a cross ball chu Stephen Quinn chuan minute 55 naah tauh goal-in Hull beiseina siam sak mah se an mamawh point hmuchhuak turin goal dang an thun belh thei tawh lo.

Arsenal tan nikum November hna a vawi khat nan midfielder Jack Wilshere chu second half-ah a lut a, a hliam a damin inkhel turin a inpeih tawh tih lantir mah se goal erawh a sual chhuak zo bik lo.

Inkhel chhehvel

Hull an hnehna kha Arsenal-in Premier League khualmuala hnehna an chan vawi 200-na chiah a ni. Anni aia khualmuala chak tam awmchhun chu Manchester United an ni a, anni hi vawi 238 an chak tawh. Tun season-ah Hull hian penalty area aṭangin goal 13 an chhuah tawh a, anni aia chhuah tam an awm lo.

Season ṭan dawn a Barcelona aṭanga London pantu Sanchez hian Arsenal goal khung tur ṭum 24-ah a inrawlh tawh. Premier League-ah bik goal 16 khung tawhin a ṭhiante goal thun tur vawi riat a siamsak tawh bawk.

Eng nge an sawi?

Arsenal manager Wenger chuan, "Season tawp dawnah hi chuan a hnuai lam team tum hi thil huphurhawm tak a nih ṭhin avangin zaninah pawh khan a harsa ang tih chu ka hre lawk vek. Mahse first half-ah kan khelh ṭhat avangin thil a awlsam phah deuh a ni. Duhthusamin season bul kan ṭan loh avangin kan lakah fan-te beiseina a bo hman lek leka mah se chu chu result hmangin kan chhang let a ni," tiin season tawp lama an result-ah a lungawi thu a sawi.

Hull manager Steve Bruce chuan, "Arsenal-te ang team quality sang kan tum a nih chuan vawi khat chetsual hi a pawiin insiam ṭhat a harsa tawh ṭhin. Second half-ah khan insiamṭhat tumin theih tawp kan chhuah a mah se kan mamawh zat goal erawh kan khung thei si lo. Match thun khelh hmabak kan la neihah hian kan chetsual a thiang tawh lo ang. Kartawpa Burnley kan hmachhawn hunah chuan point kan hmu tawh ngei ang," tiin a sawi.