Munich Open champion Murray

Britain Andy Murray chuan clay court-ah a vawi­khat nan champion nomawi a chawi. Munich Open final inkhel inhneh­tawk takah Murray hian a khingpui German Philipp Kohlschreiber chu set thumnaah a hneh hram.

Mahni ram ngeia inkhel German tlangval Philipp hi a ṭang thei hle. Philipp hian set khatna chu 7-6 (7-4), in a hloh phawt a, set hnihnaah thapui thawh ve lehin 5-7 in ala let ve leh. Final set-ah erawh 7-6 (7-4)-in Murray a dingchang ta a ni.

Murray hian ATP champion nomawi vawi 32 a chawina chiah a ni a, tun thla tawp a khelh tur French Open atan a inbuatsaih ṭha hle. Hun reitak a lo ngaihzawn tawh Kim Sears nena an inneih hnua a tournament khelh hmasa berah hnehna a chang thei a ni.

Kum 27 a upa Murray chuan,"Philipp kha pla­yer ṭha tak a ni a, a ser­vice a ṭhain sir tak taka a rawn dah ṭhin khan min ti buaiin ka tan chuan khelh a harsa hle. British mi pawh clay-ah kan champion ve thei a ni tih lantirna a nih avangin ka tan leh kan ram tan he tournament hi a hlu hle a ni," tiin a sawi.