Messi leh Ronaldo te angin Eden Hazard hi a ṭha thei - Fabregas

Chelsea midfielder Cesc Fabregas chuan a team-mate Eden Hazard chu Lionel Messi leh Cristiano Ronaldo te anga khawvel player ṭha ber te zing ami a nih theih thu a sawi.

Hetih rual hian Fab­regas chuan season tharah chuan Premier League-ah chauh ni lo Europe a ropui turin Champions League an chawi a ngaih bawk thu a sawi.

Tun season-ah Hazard hi a khel ṭha tluang hle a, Chelsea champion theih nana thawhhlawk ber te zing ami a ni nghe nghe. Premier League-ah goal14 khungin a ṭhiante goal khung tur vawiriat a siamsak bawk. PFA player af the season atan thlan a ni hial reng a ni.

Spanish midfielder Fabregas chuan, "Tun season-ah a theihna a pholang chiang hle a, kan hmu vek. Khawvela a ṭha ber te zinga mi a ni thei ang. Messi leh Ronaldo te hi tunlai player ṭha ber ber te an ni a, anni pahnih ang tho hian Hazard hian theihna leh thiamna a nei a ni," tiin a sawi.

Fabregas chuan an manager chungchang sawilang bawkin, "Jose Mourinho hi manager ṭha danglam bik a ni. Manager ka lo hrawn ve nual tawh a, mahse Jose ang hi chu ka la hre ngai lo, ani hi chuan manager dang te tih theih loh ang hi a ti thei bik tlat. Training na leh inkhel zawng zawngah a rilru zawng zawng a hmang ṭhin a, chu chuan result ṭha min neih tir ṭhin," tiin a sawi.