AIFF Elite Academy an champion?

I League Under 19-ah Mizo pathumna Malsawmzuala, Daniel Lalhlimpuia leh Lalram­zauva te khelhna AIFF Elite Academy te champion turin an din­hmun a ṭha a, he thu hi chhiar hi chuan an champion tawh hial ang.

Thawhṭanni zan khan AIFF Elite Academy-in Chanmari FC U19 lamah goal ruk an khung a, Mizoram club-in goal an khung ve lo. AIFF Aca­demy tan Mizo rawl­thar Daniel-a'n goal hnih a khung a, Assa­mese forward Milan Basumatary-a'n hattrick a siam bakah Orissa player Rakesh-a'n goal khat a khung ve bawk.

AIFF Elite Academy hian point 16 an hmu a, an hnuaia awm Pune FC U19 aiin point thumin an sang zawk. Pune FC U19 hian AIFF Academy lehpel turin Hindustan FC U19 lamah goal 13 tal an khung a ngai a, club pahnih hi nizan khan an inkhel a, result kan hre hman lo.

Nizan inkhel dangah Mohun Bagan AC U19 leh Salgaocar U19 te an inkhel a; vawiin tlai hian United SC U19 leh AIFF Elite Academy an inkhel ang a, zan lamah Chanmari FC U19 leh DSK Shivajians U19 te'n I League Under 19 match hnuhnung ber an khel ang.

Tun inelna a goal nga khungtu Daniel chuan, "Kan khelh danah kan coach Sabir Pasha leh Academy director Scott O' Donnell te an lawm a, a bik takin kan match hnuhnung pathumah an lawm lehzual. Tun dinhmunah chuan kan champion ngei a rinawm tawh a, kan result hi a lawmawm takzet a ni," tiin Vanglaini palai a hrilh.