Mizorama rawn kir leh ka duh - Pratham Singh

Mizoram Super League Sea­son khatna chu Zirtawpni zan khan zawh a ni a, final hmuhnawm takah Khatla TBL-in Zarkawt BCA 67-61 a hnehin an champion.

Tualchhung basketball tan MSL final hi hun pawimawh a ni a, India player Pratham Singh inlan chu a hlutna belhchhantu a ni.

Tamil Nadu player Pratham hian final-ah point 21 neiin a score tam ber a, rebounds 10 lain amah aia la tam chu TBL forward Nelson Lalrohlua (13 RB) leh BCA center Henry Lalramngaihawma (11 RB) te chiah an awm.

Final khelh zawhah Pratham-a'n thla lakpuitu a ngah a, Hawla Indoor Stadium-ah a mikhual lo hle.

Freethrow chungchang

Pratham hian freethrow vawi 14-ah vawi khat chiah a hlah a, an khingpui Zarkawt BCA-in vawi 26 freethrow-ah vawi 16 lai an hlah thung.

Freethrow chungchanga zawhna chhangin Pratham chuan, "Tawnhriat ngah hnu chuan pressure a awm lo a, practice tam a ngai bawk. Mizo player-te'n tawn­hriat an ngah hunah chuan an hlah tam tawh bik lo ang," tiin a sawi.

MSL chungchang

Tamil Nadu guard Pratham chuan, "India ramah basketball-in hma a sawn ve zel a, Mizo­ramah pawh tun aia chaka hmasawn hi a ṭul a ni. MSL hi kum khatna chauh a ni a, final aṭanga thlir chuan a hlawhtling hle in ka hria. Mizoramah football-in ngaina tih ka lo hria a, football vanga basketball hlamchhiah ringawt chu a fuh lo. India ramah hian basketball player tan future a awm a ni," tiin a sawi.

India player Pratham chuan sawi zelin, "Mizoramin coach ṭha tak Mapuia in nei a, coach dang pawh an awm ang. Anni nen hian kum 2004 aṭang khan kan in hre tawh a, amah aṭang hian zir tur tam tak a awm ang. Grassroots ngaih pawimawh hi Mizorama basketball hma­sawnna tur a ni," tiin khelh dan dik thiam a ṭulzia a sawi.

Let leh ka duh

TBL champion puitu Pra­tham chuan, "Nuam ka ti khawp mai. Rawn kirna chance min siam sak a nih phawt chuan MSL hi rawn khelh leh ngei ka duh," tiin Mizoram nuam a tih thu a sawi.

TBL thukhawchang

Khatla TBL manager Lal­awmpuia Pachuau chuan, "Champion tum vanga Pratham hi kan la lut lo. Season ṭan tirh khan Pratham bakah Amygot Singh kan ziak lut a, chak tum hrim hrim i lang chuan feet ruk leh inches sariha sang Amygot hi a pawimawh zawk ang. Amaherawhchu Pratham (feet 6 inches 2) ang tiat hi Mizo zingah kan tam a, India tan a khelh theih a ni tih kan lantir kan duh a. Mizo basketball hmasawnna atana chah lut kan ni," tiin Pratham an lak chhan a sawi.

A hlawhtling em?

Court chhungah Pratham a rawn lut a, nalh zetin three points a rawn score nghal. Amaherawhchu a rei tial tial a, game pangngaiah Pratham tel loin TBL an ṭha zawk a, India player ṭangkaina ber chu freethrow a ni. Pratham-a tih theih kha Mizo player-te'n an ti ve thei a, TBL hruaitute thusawi a takin a thleng dik. Chutihrualin India tana khel pha leh Mizo player-te inthlauhna tam tak hmuh hmaih ringawt erawh a fuh lo ang, Mizo zinga India team a khel hmasa ber H. Laldinsanga kha coach ni tawh mah se MSL hmasa berah Most Valuable Player a la ni.