Mayweather vs Pacquiao - Pacman a lo chak zawk reng em?

Tunlai khawvel boxer ropui ber pahnih anga chhal an ni a, Floyd Mayweather leh Manny Pacquiao an inhnek hmaa chanchin an ngah tluk zetin an inhnek hnuah pawh thuthang a tam hle. Tunhnai lawka boxer pahnih inhnekin chanchinthar an siam langsar tak chu judge pathum Glenn Feldman, Burt Clements leh Dave Moretti te an scorecard-ah point an pe sual anga sawi a awm hi a ni.

Mayweather leh Pac­quiao an inhnek khan red corner-ah Pacquiao a awm a, blue corner lamah Mayweather a awm thung. Khawthlang chanchinbu lar Daily Mail-in a tarlan dan chuan judge pathumte khan red corner point pekna turah blue corner point an pe a, blue corner point pekna turah red corner point an pe daih. Chumi awmzia chu Pacquiao point an pekna turah khan Mayweather point an pe tihna a ni a, chak lo zawka puan Pacquiao kha Mayweather chakna 118-110,116-112, 116-112 in a lo chak zawk reng thei tihna a ni.

Daily Mail-in he thuthang a report lai hian Yahoo!Sport chuan thuthang dik lo leh nuihzatthlak mai a nih thu an tarlang ve bawk.

Khawvel huap boxing writer larte ngaihdanah pawh Mayweather a sang zawk. ESPN sports writer Dan Rafael chuan, "Mayweather khel kha a ropui takzet a ni. Pacquiao khan hnek fuh tumin a um a, mah se vawi khat mah na takin a inhnektir lo a, kha kha a ropuina chu a ni," tiin a defensive skill chu a chakpui a nih thu a sawi.

Boxing lam chanchin ziaktu Ring Magazine writer Michael Rosenthal chuan, "Kum nga chhung kan nghak a, tuna chiang em em ta chu Mayweather hi Pacquiao aiin a lo ṭha zawk tih hi a ni. Mi tam takin a defensive skill vangin sawisel mah se Pacquiao-a thil tum kha a tihhlawhtlin tir duh lo a, kha kha Mayweather danglamna chu a ni," a ti.

Yahoo! sports writer Dan Wetzel chuan, "Mi 46-in Mayweather hi hneh tumin an bei tawh a, mi pahnih phei chuan vawi hnih lai an hmachhawn nghe nghe. Mahse, tumahin na takin Mayweather hi na takin an hnek fuh thei ngai lo. Pacman pawhin midang tih theih loh hi a ti thei bik lo a, a chak loh phah ta a ni," a ti.

Pacquiao-a'n phatsantu a nei?

Mayweather nen an inhnek zawh khan Filipino boxer Pacquiao chuan a darah hliam a tawrh thu leh a hliam hi an inhnek hmaa a neih a nih thu a sawi a, a dar hliam vanga injection lak a tum chu Nevada State Athletic Commission-in an hnarsak thu a sawi bawk.

Pacquiao-a'n a dar hliam chungchangah thuthar a nei leh tawh a, chu chu an inhnek hma khan a inhliam thu Mayweather-a'n a lo hriat ruk reng thu hi a ni. Mayweather nen an inhnek aṭanga ni khat liam hnuah Pacquiao chuan, "Ka darah hliam ka nei tih hi Mayweather lo hrilh ru tu an awm a ni. Kan inhnek kha in thlir kir chuan ka banah vawi tam a pawt a, ka dar ringawt tawh tum khan a bei a ni. Khata ṭanga ka chian em em chu Mayweather hian ka hliam chungchang hrilh ru tu a nei a ni tih hi a ni," a ti.

FightHype.com reporter Ben Thompson chuan, "Pacquiao camp a thil thleng zawng zawng hi a leak-out vek a, a dar hliam mai ni loin training a neih dan, tactic apply an tum dan leh bathroom vawi engzat nge a hman tih thleng hian Mayweather camp beng a thleng vek a ni," a ti.

Mayweather Promo­tions CEO Leonard Ellerbe chuan inhnek hma khan, "Pacquiao trainer Freddie Roach hian a camp chhunga thil thleng engmah kan hre lo emaw a ti hi a mawlna a ni," a lo ti tawh bawk.

Pacquiao dar hliam hi tunkar chhung ngeia zai tura ruahman a ni a, Pacquiao enkawltu orthopedic surgeon Dr. Neal ElAttrache chuan, "MRI scan kan nei tawh a, a darah hian hliam na tak a tuar tih hmuhchhuah a ni," a ti.

Pacquiao adviser Michael Koncz chuan, "Uluk taka enkawlna pek a nih hnuin a dar hliam hi dam tur chuan zai hi ṭha berin kan hre ta a ni," a ti bawk.

Amir Khan ngaineptu Floyd Sr.

Mayweather-a pa leh a trainer ni bawk Floyd Sr. chuan tunhnaia a fapa chotu Amir Khan chu awlsam takin a fapa chuan a hneh theih tur thu a sawi.

Boxing a khelh laia a defensive skill lo hming­thanpui tawhtu ve tho Floyd Sr. chuan, "Amir Khan hneh hi ka fapa tan a harsa lo ang. Pacquiao hneh ai mah khan a awl­sam ang. Khan hnek hi a na tih ka hria a, mah se tech­nical lamah a sang lo em a, ka fapa hneh turin a ṭha tawk lo. Kan tan chuan inhnek awlsam tak a ni ang," tiin British Boxer chu a dah sang lo hle.