Lazio-in Dortmund an hneh

Lazio-in Thawhlehni zan khan Borussia Dortmund 3-1 in an hneh. German club tan hian Jude Bellingham-a'n bul a ṭan a, English player zinga Champions League-a bul ṭan thei naupang ber a ni.

Italian club-in minute rukna lekah Ciro Immobile hmangin goal an khung a, Italian forward hian hemi hmaa UCL-a a goal khung hnuhnun berah Dortmund jersey a ha thung. Immobile hian December 9, 2014 khan Anderlecht lamah a pet goal a, hetih laia Dortmund coach chu Jurgen Klopp niin ni 2142 hnuah UCL-ah a pet goal leh chauh.

Minute 23-naah Dortmund player Marwin Hitz-a'n an lamah a tihluh avangin Lazio hna a awlsam phah a, minute 71-naah Borussia Dortmund  tan Erling Braut Haaland-a'n khung mah se result a danglam phah lo. 

Lazio tan Jean-Daniel Akpa Akpro-a'n minute 76-naah a khung belh a, Italian club-in an mualah 3-1 in hnehna an chang. Group F inkhel dangah Club Brugge-in Zenit 2-1 in an hneh ve bawk.

German club chak zo lo mah se rawlthar duhawm Jude Bellingham tan zan chhinchhiahtlak a ni a, kum 17 leh ni 113 mi niin UCL bul a ṭan. Bellingham hian Phil Foden-a record a khum.

Birmingham aṭanga Dortmund zawmtu Bellingham hian German club tana a match hmasa berah Duisburg lamah DFB-Pokal-ah a pet goal nghal a, club tana goal khung thei naupang ber record a siam.