Newcastle-in John Carver an ban dawn lo

Tunhnaia khel chhe em em mai Newcastle United chuan an manager ṭanglai John Carver chu season tawp hma chu an la ban rih loh tur thu an sawi.

Newcastle United manager Carver hian Inrinnia Leicester City 3-0 a an hneh loh ṭuma red card hmutu defender Mike Williamson chu langsar takin a lo sawisel tawh a, Captain Fabricio Coloccini leh keeper Tim Krul chu coach nen hian an inti thiam lo nia sawi a ni bawk.

Mahse club thu­chhuak chuan hei hi phain, "Kan manager John Carver leh a staff te bakah player zawng zawng te'n inkhelh tur pathum la awmah an rilru an sawr bing a ni," tiin thil dangin a tihbuai loh thu an sawi.

Magpies thuchhuak chuan, "John Carver leh player senior-te nen tlang taka titi hona neih a ni a, kan khelh chhiat chhanah hian mawhpuh tur bik kan awm chuang lo tih kan pawm tlang a, season tawp thleng Premier League-a kan la khelh theih nan theihtawp kan chhuah ho dawn a ni," a ti.

Newcastle hi kum tir lama an manager Alan Pardew-a'n a chhuahsan laiin table laihawlah an la awm a, mah se John Carver-a'n a enkawl hnu­in competition hrang hrangah match 17 khelin vawi 12 an tlawm tawh a ni. Magpies hi Premier League table-ah 15-naah awm mekin relegation zone aṭanga an himna hi point hnih chiah a ni.