Chennai leh Kolkata an chak

Thawhṭanni khan India Premier League-ah inkhel pahnih a awm a, inkhel hmasa zawkah Chennai Super Kings-in Royal Challengers Bangalore chu run 24 a hnehin inkhel hnuhnung zawkah Kolkata Knight Riders in run 35 in Sunrisers Hyderabad an hneh thung.

Nehra a inlar leh ta

Tun season IPL-a che ṭha em em mai Ashish Nehra-a'n a la tar loh zia tilang zelin Bangalore an tum ṭumin wicket thum a la a, run 19 chiah a pe.

MA Chidambaram Stadium, Chennai-a inkhelah hian Chennai Super Kings-in over 20-ah run 148 vawchhuakin mi pakua an hloh a, run siam hnem ber Suresh Raina chuan ball 46 a hmachhawnah run 52 a vawchhuak.

Bangalore tan captain Virat Kohli-a'n ball 44 a hmachhawnah run 48 rawn vawchhuak mah se hmun himah a naute a hlangkai zo lo a, over 19.4-ah run 124 chiah vawchhuakin mi sawm an hloh a, run 24 in a tlawm zawkah an ṭang ta a ni.

Kolkata-in Hyderabad an hneh

Eden Gardens, Kolkata-a inkhelah mual neitu Kolkata Knight Riders in mikhual team Hy­derabad lakah hawih­hawm an chhuah duh lo a, over 20-ah run 167 vawchhuakin mi pasarih an hloh. Kolkata tan Yusuf Pathan chuan ball 19 a hmachhawnah run 30 a vawchhuak. Run siam hnem fal awm lo nachungin Kolkata batsman te an inthlawp ṭha a, dinhmun duhawm takah an team an hlangkai.

Hyderabad lamin theihtawp chhuahin an target 168 hi an um a, over 20-ah run 132 bak an tlin lo a, mi pakua hlohin chak lo zawkah an ṭan a ngai ta a ni. Hyderabad tan Portuguese chhulchhuak Australia batsman Moises Henriques a che ṭha a, kum 28-a upa batsman hian ball 33 a hmachhawnah run 41 vawchhuak mah se a team a chhanhim zo ta chuang lo a ni.