Goal vanga buai Van Gaal

Manchester United manager Louis van Gaal chuan goal an khung theih loh vangin season thara Champions League an khelh loh phah a hlau.

United hi Premier League-ah a zawnin vawi thum an chak lo a, an chak loh ṭum hian goal an khung lo vek. Van Gaal-a team tan Wayne Rooney (12 goals) an goal a khung tam ber a, Robin van Persie (10) leh Radamel Falcao (4) ten goal khung an harsat.

Van Gaal chuan, "Striker goal khung thei ka mamawh khawp mai. Van Persie emaw Falcao emaw Wayne Rooney emaw pawh ni se goal an khung phawt chuan ka lawm khawp anga, team pawh an lawm bawk ang," tiin goal khung thei striker an mamawh thu a sawi.

Dutch coach chuan sawi zelin, "Goal kan khung theih loh hi ngaihven tham a tling ta. Chelsea leh Everton lamah goal kan khung lo a, West Brom lamah pawh goal kan khung lo; chance kan insiam tam chung siin goal kan khung lo hi hriatthiam har chu a ni. A zawnin vawi thum kan chak lo a, ti hi chuan sang pali zinga kan awm theihna dinhmun a derthawng ta hle," a ti.

Manchester United hian point 65 an hmu a, an hnuaia awm Liver­pool-in match thum khelh hmabak la awmah point liin an pha lo.