Aizawl FC dal theitu Chanmari FC
I League Second Division zawh nan team tinin match hnih chiah an khelh a ngai tawh a, vawiin tlai dar 3:00 hian Aizawl FC leh Chanmari FC te Golaghat Stadium-ah an inkhel dawn. I League-ah team pakhat tan chiah hmun a awm avangin palinaa awm Chanmari FC tan beisei tur a awm meuh tawh lo a, Aizawl FC tan erawh MPL lama an elpui hneh hi I League khelhna kawng chu a ni.
Aizawl FC elpuite
Pahnihna Lonestar Kashmir FC-in point 26 an hmu tawh a, Aizawl FC beiseina titawp theitu an ni. Lonestar hian vawiin tlai dar 3:00 hian Kenkre Sports an hmachhawn dawn a, match hnuhnung berah mak takin table mawngphaha awm PIFA Sports an draw avangin chak chiangsa an ni bik lo.
Aizawl FC tan Lonestar result-a innghah a thiang lo. MPL3 champion chakna chance aiin Lonestar chakna chance a sang zawk, hei vang hian vawiin result hi ṭum dang zawng aiin ngaihven tu an tam dawn. I League khel turin Round 13 khelh zawha hmahruaitu nih a pawimawh khawp ang.
Team dinhmun thlirin season thara I League khel tur hi Aizawl FC emaw Lonestar emaw a nih tawh hmel a, vawiina Aizawl FC hmanchhawn tur Chanmari FC hi league ti ngaihnawmtu an ni. Chanmari FC hian an match hnuhnung berah Lonestar an khel ang.
Pathumnaa awm Mohammedan SC-in vawiin zing dar 9:30-ah Hindustan FC an khel dawn a, Kolkata club hian beisei tur tlem an la nei a, anni hi Round 14-a Aizawl FC hmachhawn tur an ni.
Luh theih dan
Aizawl FC hian an match hnih khelh hmabaka point li an hmuh theih chuan I League an khel ang, head to head-ah Lonestar aiin an ṭha zawk. Lonestar tan tling chiang turin point ruk hlawhchhuah a ngai a, Aizawl FC chetsual chan a ngai bawk.
Mohammedan SC tan beiseina nei turin point ruk an neih a ngai a, Aizawl FC-in Chanmari FC laka point hnih an hloh a nih chuan Mohammedan hian tling turin an match hnung berah Aizawl FC hi goal hnih tala an hneh a ngai. Chutah chuan a la tawp mai lo, Lonestar-in an match hnih hmabakah point thum aia tam an hmuh a thiang lo bawk.
Aizawl FC Vs Chanmari FC
Football-ah chuan Mizoram tan tih vanga inhriatthiam a theih loh. Chanmari FC hian chak tumin an khelh a ngai a, Aizawl FC-in awlsam taka chak an beisei tur a ni lo, I League khel tlak an ni tih lan tir hi an mawhphurhna a ni.
MPL1 Playoff aṭanga team inel tak inkhel tur hi Chanmari FC dinhmunin a zir tawk loh avangin a boruak a dang phah lo ang. Siliguri-ah hnamdangin awlsam taka Aizawl FC an chak mai an ring a, mahse an rin angin an inkhel lo. Team pahnihin chak tumin an khel a, Chanmari FC 3-2 in an chak. MPL1 club pahnih hian Mizoram infiamna hi 'match fixing' lakah an fihlim tih puanzarna hun ṭha an nei a, state dang tan entawn tur hnutchhiah theih hun a ni.
Aizawl FC-in Chanmari FC aṭanga an lak William Lalnunfela chu hrem vangin an chhawr thei dawn lo a, player dang erawh an dam ṭha. Chumi awmzia chu boruak nei taka Chanmari FC chhuahsantu R. Malsawmtluanga'n a ṭum hnih nan a club hlui a hmachhawn thei dawn tihna a ni. MPL2 best player MS-a hian a club hlui hneh loh nawn a tum lo ang.
Chanmari FC-in defender pawimawh Lalruatthara leh H. Lalmuankima te hrem vangin an hmang thei dawn lo a, mahse player pahnih vanga buai tur an ni lo. Mizoram Police innghahna F. Lalrinpuia, Lalbiakhlua leh V. Lalṭanpuia te khelhna hian Aizawl FC hi an ngam khawp ang.
Eng nge an sawi?
Aizawl FC coach K. Malsawmkima chuan, "Chanmari FC laka point thum hlawhchhuah hi kan tum a ni a, point li chauh kan mamawh tawh avangin anni hneh hi a pawimawh takzet a ni. Kan dinhmun hi ṭha viau anga lang hian a la harsa em em a, Chanmari FC hi kan hneh tawh loh an nih avangin awlsam taka chak theih a ni lo ang. Amaherawhchu Pathian zarah I League khelh ngei kan inring a, Mizo mipuite ṭawngṭai puina kan ngen tak meuh meuh a ni," tiin a sawi.
Chanmari FC coach H. Vanlalthlanga chuan, "Kan chak theih chuan chak vek kan tum, kan chak loh chuan kan chak lo a ni mai," tiin an khelh hmabaka theihtawp an chhuah tur thu a sawi.
Player-te fak zuiin Thlanga chuan, "February 25 aṭang khan Santosh Trophy khel turin Mizoram kan chhuahsan tawh a, player-te hian an tih tur an chiang a, in lam ngaihna an nei lo. Kan player-te rilru put hmang a puitling tawh a, hetiang zela kan kal theih chuan thui tak an thleng thei ang. I League kan khel pha lo a nih pawhin tuna kan inkhel hi a thlawn lo ang, phai lam club-ah kan player ṭhenkhat hi chu an lut ngei ang," tiin a sawi.
Team Dinhmun
# Team Pld W D L GF GA GD Pts
1 Aizawl FC 12 9 1 2 37 16 21 28
2 LoneStar Kashmir FC 12 8 2 2 21 12 9 26
3 Mohammedan Sporting 12 7 2 3 26 13 13 23
4 Chanmari FC 12 6 4 2 32 20 12 22
5 Hindustan FC 12 4 2 6 16 25 -9 14
6 United SC 12 4 1 7 19 26 -7 13
7 Kenkre Sports 12 2 0 10 15 34 -19 6
8 PIFA Sports 12 0 4 8 11 31 -20 4