Camp Nou-ah Guardiola a kir dawn
Bayern Munich coach Pep Guardiola chu zanin hian 'Lal' anga a lo len tawh ṭhinna Camp Nou-ah a kir dawn a, a kir dan tur erawh a dang ta. Zanin dar 12:15 hian German champion Bayern Munich leh La Liga hmahruaitu Barcelona te an intawng dawn a, Barcelona coach hlui Bayern manager ni ta Pep-a'n a team hlui a hmachhawn dan tur hi football ngainatu te hmuh chak a ni.
Team pahnih intawn hnuhnun ber kum 2013 khan Barcelona-in Bayern Munich an ngam lo hle. Germany-ah 0-4 a an va tlawm hnuin an khelmualah 0-3 in an tlawm leh, inkhel pahnih belhkhawmah 0-7 laiin an tlawm a, Bayern-in Champions League nomawi an chawi chhunzawm. Zaninah erawh Barcelona-in 2013-a an mualphona thaibo tumin theihtawp an chhuah ang.
Tunhnaia khel ṭha lo Bayern
Khualmuala zinchhuak tur Pep-a nau te hi tunhnaiah an khel chhe hle a, match hnih chhung chu a zawnin an chak lo tawh. An match hnuhnung vawi 15-a vawi 16 chak thei Barcelona tum hi an chak lo ang.
Bayern boss Guardiola lu ti hai tu tur chu a players rinrawl zinga inhliam an tam lutuk hi a ni. Guardiola hnuaia khel ṭha em em mai Arjen Robben leh Franck Ribery te chu an inlan theih dawn lo ang. Robert Lewandowski erawh a inlan theih beisei a ni.
An match hnuhnung panga a goal 20 thuntu Barcelona hmachhawn hi David Alaba leh Holger Badstuber tel lo a khel tur Bayern tlarhnung tan a chakawm loh ang.
Lionel Messi, Luis Suarez leh Neymar te inkawp hian tun season-ah goal 100 chuang an khung tawh a, eng club defender mahin MSN dan lo tum hi an 'zuam' lo ang. Tun season-a goal 40 thun tawh Messi hian zaninah Barca tana a European match 100 na a khel tling ve chiah ang.
Barca ngam loh Bayern
Bayern Munich leh Barcelona hi ṭum riat lo intum tawhin German club an chungnung hle. Bundesliga champion hian vawi riat an inkhelh tawhah La Liga hmahruaitu team hi vawi nga lai hnehin vawi hnih an inhnehtawk pui a, vawi khat an tlawm ve thung. Record hlui en chuan Bayern hi inchhuang tur zawk an ni.
Champions League-a Camp Nou-a Barcelona hnehtu hnuhnung ber pawh Bayern tho an ni a, May 2013-a 3-0 an chak hnu khan team dangin Barcelona an la hneh ve lo.
Bayern-in Champions League semi-final a zawna kum li chhung an khelhna tur a ni ta a, team dang zingah kum 2008-2013 chhunga kum ruk chhung khel thei Barcelona leh kum 2011-2015 chhunga khel thei Real Madrid chiah an chunga awm an ni.
Guardiola vanga buai lo tur Barca
Barcelona president Josep Maria Bartomeu chuan an coach hlui Guardiola vanga an chi ai loh tur thu a sawi.
Josep Bartomeu chuan, "Barcelona-a hna ropui tak lo thawk tawhtu a ni a, chuvang ngawt chuan kan chiai tur a ni lo. Inkhelh zawhah pawh dressing room-ah lutin player te nen inkawmna an neih ka ring ," tiin boruak zangkhai tak hnuaiah an manager hlui chu lo hmachhawn an tum thu a sawi.
Kum 44-a upa Guardiola hian kum hnih chhung lek Bayern a enkawl chhungin Bundesliga title pahnih bakah Club World Cup a chawipui leh tawh a ni.