Liverpool lung a awi thei lo

Career titawp hial thei khawpa hliam hlauhawm tuarin Virgil van Dijk a indawmkun mek a, an defender chhuanvawr hliamtu Everton goalkeeper Jordan Pickford chet danah Reds player-te an lung a awi thei lo. 

Liverpool midfielder Georginio Wijnaldum chuan, "Hrehawm kan ti takzet a, Pickford-a ball chuh dan kha a âtthlâk hle a ni. Hetihrual hian VVD kha khati taka hliam kha a duh bik kherin ka ring lo. 

"Ka ngaih danah chuan Everton player-te khan an ti mah mah a ni. Derby a hnehna chan chu mi zawng zawngin an duh a, a chang chuan ṭum dang zawng aia ṭan lehzual pawh a awl hle. Mahse, an ti mah mah - Pickford chet dan chauh a ni lo a, Thiago laka Richarlison chet dante kha a mawi lo takzet a ni," tiin a lawm lo. 

Dutch midfielder chuan sawi zawmin, "Football-ah chuan a chetsual theih tehmeuh mai. A chang chuan vanduai vang liau liauin player dang hliam pawh a awl. Mahse, Everton player-te chet dan erawh pawm a harsa a, Pickford hrem a ni lo lehzel hian minti lawm lo lehzual a ni," a ti. 

Wijnaldum chuan Van Dijk inhliam zanah khan player-ten mutthilh an harsat thu thlengin a sawi - mahse Pickford erawh a hun laia hrem a nih tawh loh avangin FA chuan hrem an tum lo a, kha thil thlen lai khan VAR pawh an rawn thlap niin a lang. 

Liverpool boss Jurgen Klopp chuan, "Kha inkhela thil thleng pahnih kha chu pawm a harsa a ni. Football-ah chuan inhliam theih a ni a, mahse chutiang chu ball inchuhin a thleng tur a ni," a ti a, Richarlison leh Pickford chu ball  chuh loa player hliam tumah a puh. 

Klopp chuan, "Kha game-ah khan thil ṭhenkhat chu a rualin a thleng ṭhap. Referee ṭha tak Michael Oliver-a'n thil thleng kha a hmu lo a, VAR-in dan awmsa a mangnghilh bawk. 

"Player-te kha hrem ka duh ngawih ngawih a ni hran lo. Mahse, thil dik lo kan ti a nih chuan a vuak let pawh kan tuar ngam tur a ni," tiin a lawm thei lo.