Dinthar leh Kanan Veng an inlan dawn

Vawiin hian Lam­mualah CT Group Cup Inter Branch YMA Football Tournament, 2015 round of 32 chu a nithumna atan khelh chhunzawm leh a ni ang.

Inkhel hmasa ber hi chawhma dar 10:00-ah ṭan a ni anga, Dinthar leh Hualngohmun an in hmachhawn ang. Tun tournament-ah Dinthar hian Lengte leh Model Veng an hneh tawh a, goal 11 thun tawhin an lamah goal khat chauh ala lut thung. An khingpui tur Hualngohmun pawh hian match hnih khel tawhin Zuangtui (4-0) leh Zemabawk N (3-1) an hneh bawk.

Chhun dar 12:00-ah Bethlehem Vengthlang leh Kanan te an inkhel leh ang. Bethlehem Vengthlang hian round of 32 thleng tur hian harsatna an la tawk lem lo a, Falkland chu 6-1 a an sawp bakah Jt. YMA, Vairengte chu 4-0 in an hneh bawk. Kanan lam pawh an duai bik lo, Bawngkawn 'S' 4-1 a an hneh bakah an match hnihnaah Ramthar 'N' chu 5-0 in an sawp bawk.

Inkhel hnuhnung berah Jt. YMA Kawnpui leh Aizawl Venglai te an inkhel dawn a, anni hi chawhnu dar 2:00-ah an inkhel ṭan ang. Round of 32 kalkawngah Jt. YMA Kawnpui hi Aizawl khaw pawn aṭanga team ṭha ber pawl an ni ngei ang. Lawipu 9-0 a an sawp bakah ITI Veng chu 3-0 in an hneh thei bawk a ni. An khingpui tur Aizawl Venglai lam hian an match hmasa berah Nursery Veng chu 6-2 in hneh mah se an match hnuhnung zawkah Kulikawn chu 1-1 a an inhnehtawk pui hnuin penalty shootout-ah 6-5 in an hneh hram.