Ten Hag - Out, Nistelrooy - In

Manchester United dawh theihnain a tlin ta lo, an manager Erik Ten Hag an ban. FA Cup leh League Cup chawipuitu manager Ten Hag hi a hnampui Ruud van Nistelrooy-a'n a hmun ruak a luah lailawk ang.

Premier League history-a record nei ṭha ber Man United hi league match kua aṭangin point 11 an hmu a, 14-naah an awm mek. Relegation zone aṭanga an himna chu point sarih chauh a ni a, chutihrualin pakhatna an hmelma Manchester City an phak lohna point 12 daih a ni.

Thu duhawm chu

Manchester United ṭantuten Ten Hag chungah rinna an nghat zo tawh lo a, Pathianni zana West Ham United an hneh loh zawhah Dutch manager ban thu hriat tur awm lo mah se nimin tlaiah erawh club lamin an beisei ang thuchhuah an siam.

Red Devils chuan, "Erik ten Hag chuan Manchester United-a first team manager hna a kalsan. Erik hi kan bula a awm chhunga a hnathawhah kan lawm a, a hmalam hun atan duhsakna kan hlan.

"Manager nghet tur lak hmain Ruud van Nistelrooy-a'n hna a chelh lailawk ang a, coaching staff awm saten an pui ang," tiin thuchhuah an siam.

Man United striker hlui Nistelrooy hian PSV Eindhoven a enkawl tawh a, 2022 Johan Cruyff Shield leh 2022–23 KNVB Cup te a chawipui tawh. Hei bakah hian PSV Under 17 leh Under 19 te a enkawl tawh bakah World Cup 2014-ah khan Guus Hiddink thachhang dawltu a ni.

Manager ṭha lak tur an awm lo a nih chuan Nistelrooy hian manager hna nghet hi a nei thei hial ang. Chutihrualin player anga fan-te ngainat hi manager an nih hnuah a ṭha ber an ni kher lo a, Chelsea fachuam Frank Lampard pawh Stamford Bridge-ah a hlawhtling thei lo.

Nistelrooy chungah football tuipuitute mit a fu dawn a, October 30, Nilaini zana League Cup last 16-a Leicester City an mikhual hunah ngaihven a hlawh nghal ang.

Ten Hag bantu Dalot?

Man United hian Pathianni zan khan West Ham an hmachhawn a, 2-1 in an hneh lo. London Stadium-ah Hammers tana Crysencio Summerville khung chu Casemiro hmangin Man United-in sut mah se penalty spot aṭangin Jarrod Bowen-a'n injury time-ah chakna goal a khung.

Ten Hag hnuaia an match hnuhnung berah Man United an khel ṭha hle. Ṭan phat aṭangin chance an nei a, Alejandro Garnacho, Bruno Fernandes leh Diogo Dalot ten chance ṭha bik an hlah vek. Chance zawng zawnga chance ṭha ber chu Dalot-a'n a hlah a, Portuguese wing back hian goalkeeper Lukasz Fabianski a tlan pelh vek hnuah goal ruakah a pet over. Dalot hi Ten Hag bantu chu a ni hauh lo a, mah se goal kha khungin Man United chak se, Dutch manager hi an ban kherin a la rinawm loh.

Referee zawk alawm!

Man United khan London Stadium-ah point khat hlawh chhuak ta se, Ten Hag-a chance pek dan a la awm mai thei. Mahse, referee David Coote-a'n Hammers penalty a pe a, inhnial theihna tak a ni. Dutch manager Ten Hag chuan penalty-ah a ngai lo a, mah se VAR a inrawlh hnu leh monitor hmanga ennawn a nih hnuah penalty pek a ni miau si.

Premier League chuan, "Referee-in a tirah khan penalty turah a ngai lo. Mahse, VAR-in De Ligt-a khan Ings-a ke hnuai lam kha a su chiangah a ngai a, chuvangin thil thlen dan ennawn turin an hrilh. Referee-in thutlukna hmasa thlakin penalty a pe," tiin an sawifiah.

Eng ang pawhin insawifiah se, thil thleng tur ang a thleng tawh. Hammers laka an tlawm avangin Man United-in Ten Hag chunga rinna an nghat ngam tawh lo a, Nistelrooy hoin kawng thar zawh an tum. Old Trafford-ah hlim ni kawl êng ve tak ang maw?