Gunners khelmualah Reds-in point an hlawh chhuak

Pathianni zan khan Premier League inkhel hmuhnawm bik chhawpsak kan ni - goal li kan hmu a, chak zawk an awm lo thung. Arsenal-in Liverpool an mikhual a, 2-2 in an inhnehtawk.

Gunners hian Bukayo Saka leh Mikel Merino hmangin vawi hnih ngawt hma an hruai a, Liverpool-in captain Virgil van Dijk leh Mohamed Salah hmangin an chhanglet a, point an hlawh chhuak hram.

Liverpool an chak zawh loh avangin Premier League hmahruaitu aṭangin pahnihnaah an tla thla a, hmahruaitu Manchester City chu point khatin an phak lo mêk. Mahse, si phurh sut zotu an nih avangin Reds an lawm zawk ang - Arsenal-in hun tawp dawnah Ethan Nwaneri hmangin chakna goal khungah an inngai a, mahse, a goal hmaa foul awm avangin referee-in a pawmsak lo.

Bournemouth hneh loh hnuah Arsenal-in team ṭha Liverpool lakah point khat an hlawh chhuak a, mahse, Emirates Stadium-a khel an ni a, vawi hnih ngawt hmahruaitu zawk an ni bawk - point hlawh chhuak ni loin, point hnih hlohah an inchhiar a rinawm.

Bhoom Saka!

Arsenal khelmualah mualneitu team-in an khelmuala inkhel an ni tih lantir an duh a, Reds an nawr nghal - player lang hmasa ber chu hliam dam hlim Saka a ni a, English forward hian minute kuana lekah goal hmahruai a khung.

Saka hian Liverpool full back ṭha mi Andy Robertson a 'rep' hnuah, kawh zetin a shot a, hliam vanga Alisson inlan theih loh vanga si ban nghaktu Caoimhin Kelleher tan tih theih a awm lo - a goal chiang takzet.

Mahse, mikhual khelmualah Liverpool an zam phah lo. Tun season inelna hrang hranga vawi khat chiah la tlawm team hian an chhanglet vat a, goal an chhuah aṭanga minute kuanaah captain VVD chuan si phurh a sut.

Trent Alexander-Arnold-a corner aṭanga ball kal chu Luis Diaz-a'n a lo tauh thawi hnuah Dutch defender Van Dijk hian a lo tauh ve leh a, goal-ah a lut.

A hmawr bawktu Salah

Goal an chhuah hnuah Arsenal an hnual duh bik lo. Liverpool tlarhnung an nawr chhunzawm a, Reds an talbuai ṭhin hle. Chawlhlawk hman hmain Gunners hian an khung belh ta nge nge a, a khungtu chu Mikel Merino a ni.

Nipui laia Real Sociedad aṭanga Arsenal pantu midfielder hian Declan Rice-a freekick aṭanga ball kal chu a tauh lut a, video assistant referee (VAR) hmangin rei tak ennawn ni mah se, referee-in a tawpah goal-ah a pawm.

Si phur chungin Liverpool-in chawlhlawk an hmang a, mualneitu Gunners an hriam viau bawk. Mahse, Liverpool hian an khelh ṭhat loh ni pawha danglamna thlen ṭhin player pakhat an kawl a, a hming chu Mohamed Salah a ni.

Salah hian minute 81-naah, mahni hmasial lo taka Darwin Nunez-a siamsak chu goal-ah a chantir a, si phurh a sut - Liverpool tana ṭanpui vartu hnai reng Salah hian tun season inelna hrang hrangah match 13 khela goal riat khungin, assist vawi sarih a nei ta.

Slot a dawih!

Arne Slot-a hnuaia match 13 an khelhah Liverpool hi vawi khat chiah an la tlawm a, vawi khat draw neiin, vawi 11 an chak. Mahse, ni e, mahse, tih a la ngai tho - Jurgen Klopp-a hnuaia attacking football hmuhnawm en ṭhin Kop ho tan chuan Slot hi a dawih hret em aw, tih chu awl tak a ni.

Arsenal-in tlarhnunga an rinrawl William Saliba chhawr thei loin inkhel an hmachhawn a, second half-ah Gabriel leh hliam dam hlim Jurrien Timber te chu hliam vangin lakchhuah an ngai bawk.

Gunners hian Gabriel an chân rualin, tlarhnung lamah rilru an seng nghal a, hei vang hian Reds-in an nawr na sawt - mahse, Slot-a'n fimkhur takin game a thlir a, pawng tawng nawr ngawt ai chuan fimkhur taka a team khelhtir a thlang.

Hei vang hian tlarhma nei ṭha Liverpool goal nawr a na tawk lo a, hetihrual Arsenal counter erawh hlauhawm ṭhin tak a ni. A tawpah inkhel thlak danglam thei player an neih Liverpool-in an vanneihpui a, tun season chiah contract nei tawh Salah hi an chelh ngei a ngai!

Hei le Arsenal...

Gunners-in an league match hnuhnung berah Bournemouth an hneh lo a, vawi khat chak loh pawizia hrechiang tur ber chu Jurgen Klopp kha a ni - Liverpool boss hlui hian point khat leka Premier League nomawi chawi loh season-te pawh a nei hial a nih kha.

Mahse, Arsenal hian hnual mai loin, huaisen takin Liverpool an lo hmachhawn a, chak zo ta chiah lo mah se, a bik takin first half-a an game chu mit titlai a tling a, Mikel Arteta nauten an pu duhdan an hre chiang.

Gunners hian mual vei lam sir aṭanga Liverpool tlarhnung pawh hawn chu an thupui a ni. Mual vei lamah khel ṭha em em Saka a awm a, a thlawp tura Kai Havertz tawlh phei ṭhinin, hei hi VVD-a'n a um chuan mual lai a awl chiah a, false nine anga khel Leandro Trossard-a'n a rawn hnawh khat chiah ṭhin.

Mahse, Arteta ruahmanna hi Gunners player-ten an bel tawk lo em ni chu aw, tih tur a ni a, Trossard-a'n hmun awlah ball a hmu ṭha tawk lo a, Liverpool midfield pherh tak karah an chak zo chuang lo - a tawpah chuan 'draw result awm a ni e' tih pawhin hnial luih a har mai thei.