Zanin dar 7:00-ah Dawrpui Vs Zonuam

BR Studio MFA Inter Veng Futsal Tournament semifinal hmasa zawk chu zanin dar 7:00 hian R. Dengṭhuama Indoor Stadium-ah khelh a ni dawn a, Dawrpui leh Zonuam te an inhmachhawn ang.

Zonuam hi chu futsal khel thiam veng an ni a, MFA Futsal League club an neih bawk avangin tawnhriat pawh an nei ṭha a, an khelh dan pawh an inhrechiang hle.

MPL ṭantirh lama hming langsar ni phak Lalṭhazuala'n (Puitea) futsal lamah hming a chher a, Zonuam khaipa ber a ni. Semifinal an thlen theih nan Zonuam hian Aizawl Venglai 9-1 zetin an sawp a, hei hian team ṭha an nihzia a pholang.

Dawrpui hian Division I-ah club an nei thung a, squad chhah lo mah se bul ṭan tur player an nei chhe lo. Tualchhung futsal-a player ṭha zinga mi Marema an kawl a, captain Vanlalmawia'n tlarhnung aṭangin team a ho ṭha bawk.

Chutihrualin futsal erawh football nen a kalphung a danglam daih a, chak tur zawk rin thiam a har a, minute hnih khat chhung lekin inkhel kalhmang a danglam chak hle. Hei vang tak hian au phurtu tur ṭantu mipui an pawimawh dawn a, Dawrpui leh Zonuam mipui inbeihna a ni tel ang.