MPL12 Qualifier Ramhlun North-in Kanan an hneh

Nimin khan Mizoram Premier League khel tur zawnna MPL12 Qualifier khelh ṭan a ni a, Ramhlun North-in ADFA First Divison-a an hneh loh Kanan FC chu 2-1 in an hneh. Laldampuia kaihhruai Ramhlun North hian October 30, Nilaini chawhnuah Lawngtlai club MLS FC an hneh chuan MPL12 an khel dawn.

Chawngthansanga kaihhruai Kanan FC-in October 25, Zirtawpni zanah ADFA First Division match hnuhnung ber an khel a, College Veng 4-0 a hnehin khingpuite hneh vekin an champion. Mahse, Kanan hian hahdamna hun ṭha an nei lo a, champion-na kawnga an player pawimawh Joseph Lalṭhafela khel thei lo an tuar bawk.

RG Stadium-a inkhelah Ramhlun North-in bul an ṭan ṭha a, first half-ah Lalnunsanga leh Lalmuansanga te hmangin an khung. Second half-ah Kanan insiamṭha mah se si phurh an sut zo thei lo a, minute 60-naa Nicholas Vanlalhmangaiha goal ṭha zet pawh scoreline timawitu chauh a ni.

MPL12 Qualifier-ah hian team pathum Kanan FC, Ramhlun North FC leh MLS FC te hi vawi khat ṭheuh an inkhel kual ang a, a sang berin MPL an khel dawn. Pahnihna tan MPL khelhna kawng a la inhawng dawn a, MPL11-a pasarihna Chawnpui FC nen November 4, Thawhṭanni leh November 6, Nilaini hian double legged playoff an khel ang.