Chelsea an insiamṭha nghal

Anfield-a Liverpool an ngam loh hnuin Chelsea an insiamṭha nghal a, an mikhual Newcastle United chu Pathianni zan khan 2-1 in an hneh - Blues tan Nicolas Jackson chuan minute 18-na lekah goal hmahruai a khung a, Magpies hian Alexander Isak hmangin first half-ah an sut.

Stamford Bridge a nghing a, mahse, London club hian player thiam bik an nei - mamawh hunah tak Cole Palmer a inlar a, Chelsea thiampuipa hian second half minute hnihnaah chakna goal a khung.

Kum 22 mi Palmer hian tun season Premier League-ah match kua khelin goal sarih a khung ta der a, assist vawi nga a nei tawh bawk. Chelsea indinthar an tumna kawngah English attacking midfielder hi a pawimawh zel ang.

Chelsea boss Enzo Maresca chuan, "Hei vang hian alawm mipuiin inkhel en tura pawisa an sen ṭhin," a ti a, Palmer a dah sang hle - Spanish coach hian sawi zawmin, "Mipuiin Palmer ang player hi hmuh an duh ṭhin a, ani ang kan kawl thei hi kan lawm hle a ni," a ti.

Magpies tan Isak chuan goalkeeper Robert Sanchez a tlan hel hnuah si phurh sutna remchang a nei a, mahse, a pet nghal mai loh avangin Blues defender-ten an tibuai hman - a ui vawng vawng ang.

Chelsea tan hun pek belhah Christopher Nkunku chuan penalty a hlawh chhuakah a inngai bawk a, referee pawhin penalty spot a kawk hman. Mahse, video assistant referee (VAR) rawn hnuah referee-in thutlukna a thlak a, Nkunku hi amahin a tawlhthlu niin a lang.

A tawpah erawh Chelsea an chak ta tho a, league match kua an khelh tawha an vawi nga chakna niin table-ah pangana an ni mek - an chungah Manchester City, Liverpool, Arsenal leh Aston Villa an la awm.