Martin hmaah Bagnaia a thleng

MotoGP champion ni lai Francesco Bagnaia chuan a nomawi humhim a la tum zel, a la beidawng duh lo - Pathiannia tlan zawh tak Thailand Grand Prix-ah hnehna a chang.

Bagnaia hi tun season rider championship hmahruaitu Jorge Martin hmaah a thleng, championship table-ah erawh Martin hi a chungnung zawkah a la awm, rider pahnih inthlauhna hi point 17 a ni mek.

Chang International Circuit, Buriram-a intlansiakah Bagnaia hian a hmasa ber aṭangin intlansiak bul ṭan mah se pathumaah a thlahniam hman. Mahse, lap ngana an tlan zawh chuan Martin hmaah tlanin hma a hruai chhunzawm.

Italian rider Bagnaia hi Martin bakah Marc Marquez hmaah a thleng thei a, tun season bike intlansiakna sang berah hian vawi kua a chak tling ta chiah a, chak tam viau mah se chetsual ṭum a nih fo avangin a pumpuiah Martin a phak lo.

Kum 27 mi Bagnaia chuan, "Zing karah kan tlan chhin a, ka beisei leh duh anga thil a thlen loh avangin ka lungngai hman hle, mahse ka team lamin an thawh ṭhat em avangin intlansiak takah result ṭha tak ka nei theih phah.

"Intlansiak hautak a ni dawn tih kha kan hre lawk sa vek a, chumi hma chhawn tura kan inbuatsaihna a ṭha kha a lawmawm, mimal tih ṭhat chauh chu hnehna chan nan hian a tawk zo lo," tiin a sawi.

Championship hmahruaitu Martin erawhin lap nganaah a duh ang takin a bike a thunun thei lo a, tlankawng sir lam a nek deuh avangin Bagnaia chu hmun a kian, atan a hmasa bera tlan chhunzawm theih a ni ta lo.

Spanish rider Martin-a chuan, "Vawi khat lek tihsual zeuh neih pawh hi a pawi thui ṭhin, insiamṭhat tumin theihtawp chhuah takmeuh ṭhin mah ila a harsa tawh. Chutihrualin, pahnihna dinhmun luah phak erawh ka tan thil ṭha tak a ni," a ti.

Inrinni khan Sprint Race tlan a ni a, hemi ṭum hian Enea Bastianini chu a tlan chak ber. Pahnihna aṭangin intlansiak bul ṭan mah se a tir lamah chesualin hnung takah a awm, a tawpah 14-na a ni phak hram.

Bike intlansiakna sang leh ngaihhlut hlawh ber MotoGP hi tun season atan vawi 18 an tlan tawh a, tlan hmabak pahnih an la nei. November thla tir hian Malaysian GP an tlan dawn a, a hmawr bawk nan Valencian GP an la hmabak bawk.