Bayern an insiamṭha nghal

Bayern Munich-in Champions League-ah Barcelona lakah goal li ngawt chhuahin mualpho mah se Bundesliga-ah erawh buaina a nei lo. Vincent Kompany hoten Vonovia Ruhrstadion-ah mual neitu Bochum 5-0 in an sawp.

Pathianni zan inkhelah Bochum-in chance an nei hmasa zawk a, Moritz Broschinski-a'n Bayern keeper Manuel Neuer tlan pel vek tawh mah se defender Kim Min-jae-a'n goalline a pelh hmain a pet chhuak hman.

Bayern midfielder Michael Olise-a'n minute 16-naah freekick aṭangin mawi zetin a khung a, Kompany hote tan hna a awlsam phah. Freekick aṭang bawkin Bayern-in an khung a, Joshua Kimmich-a freekick pet chu Jamal Musiala-a'n a tauh lut.

Second half-ah Musiala-a'n ṭha taka a khalh luh hnuah Harry Kane a pe a, English striker hian minute 57-naah goal thumna a khung. Leroy Sane-a'n minute 65-naah mawi zetin box pawn aṭangin a ke vei lamin a hlai lut a, minute 71-naah Kingsley Coman-a'n a ke dinglamin a rawn hlai lut ve bawk. Goal pahnih hi a class dun hle.

Bayern-in goal dang khung belh tawh lo mah se goal nga an khung tho avangin an result-ah an lawm ang. Kompany hote hian point 20 an hmu a, RB Leipzig nen an point hmuh zat a inang. Mahse, Bayern erawh goal difference 22 a ni a, RB Leipzig chungah awmin pakhatna an ni.