Inter leh Juventus inhnehtawk

Serie A champion lai Inter Milan chuan an nomawi kawl lai chuhpuitu Juventus an lo mikhual a, goal riat ngawt lutin team pahnih hi 4-4 in an inhnehtawk a, point khat ve veah an lungawi a ngai.

Pathianni zan San Siro-a inkhelah team pahnih ten a khat mawi tawkin goal an inkhung chhawk deuh reng. Inter Milan tan Piotr Zielinski chuan goal hnih a khung a, ani bakah hian Henrikh Mkhitaryan leh Denzel Dumfries ten an khung bawk.

Mikhual Juventus an awm mai mai bik lo, an si phurh chu Dusan Vlahovic hmanga an sut bakah Timothy Weah chuan a belh a, hun tawp dawnah Kenan Yildiz chuan goal hnih khungin an siphurh a sut zo ta vek a ni.

Inter Milan coach Simone Inzaghi chuan, "Goal kan khung hmasa zawk a, second half-ah phei chuan goal hnihin kan sang zawk, a tawpah kan sut zawh tir kha chu keimahni lam thiam loh a ni tih a chiang.

"Coach tan chuan point thum hmuh a lawmawm a, chumi tur pawh chuan kan dinhmun a ṭha hman. Inkhel zawh hma a rilru dang pu kan awm niin a lang, kan chak zawh lohna lai hi kan ennawn nghal ang," tiin a tawp dawna goal hnih an chhuah danah a lawm lo.

Inter hian Serie A match kua aṭangin point 18 an hmu a, an chungah Antonio Conte enkawl Napoli chu point 22 hmuin an awm mek - tun season chu Italian champion nih tum ngam an tam a, inelna a hautak dawn.

Pathumna ni lai Juve manager Thiago Motta chuan, "Goal li kan chhuah a, chumi zat chiah chu kan khung bawk. Thlirna chi hnih a awm thei ang, a hmasa zawkah chuan Inter Milan laka goal li khung kha a ṭha.

"Chutihrualin keimahni lama goal li a luh avangin insiamṭhat kan ngai ve bawk. Match hmasa lama kan tlarhnung phui tak ang kha neih let leh nghal kan tum tur a ni ang," tiin a sawi.

Old Lady hian Inter Milan an tum hma khan tun season Serie A match pariat aṭangin goal khat chiah an chhuah, tun ṭum match khat leka goal li chhuah chu Motta-a leh a naute tan a tam mah mah.

Pathianni zan Serie A inkhel dangah AS Roma an mualpho - Roma hi an mikhualna ramah Fiorentina chuan 5-1 ngawtin an lo sawp, point 10 chauh an la hmuh avangin an dinhmun a ṭha lo, a sang zual pali zinga tel phak a harsa ang.

AC Milan leh Bologna te pawh inhmachhawn tur an ni a, amaherawhchu thlipui leh ruah sur vanga tuilian thleng mai thei a nih avangin tunkar tawpa an inkhel tur chu a hun sawnsak an ni a, an inkhelh hun tur erawh tih chian a la ni lo.