Tlawm loin PSG an kaltluang zel

Paris Saint Germain chuan an mikhualna ramah Marseille chu 3-0 in an hneh a, coach ṭha Luis Enrique leh a naute hian tun season Ligue 1 match vawi kua an khelh tawhah tlawm an la nei miah lo.

Orange Velodrome-a inkhelah PSG hian goal an nei hma, minute sarihna lekah Joao Neves hmangin an khung ṭan a, mualneitu Marsille midfielder chu minute 20-naah hnawhchhuah a ni zui.

Player an kim lo a, hei mai hi a la ni lo - chawlhlawk hmain defender Leonardo Balerdi chuan anmahni lamah a tih luh bakah, winger Bradley Barcola chuan a khung belh, half time an hman laiin chak zawk tur a chiang.

PSG manager Enrique chuan, "Min ṭantute hian kan lakah beisei an nei sang hle a, a sang leh ṭha thei ang ber thleng turin min duh ṭhin, tun ṭumah hian an duh ang chu kan tihsak thei niah ka ngai.

"Marseille hi team ṭha leh champion thei zinga mi an ni hial a, anni ang lakah goal thum faia kan chak thei a nih chuan kan khelh danah kan lawm tur a ni a, min ṭantute pawh an lungawi ngei ang," tiin a sawi.

PSG hian tun season Ligue 1 match kua aṭangin point 23 an hmu a, a chung berah an awm chhunzawm. Anmahni hnaih bertu AS Monaco aiin point thumin an sang, an dinhmun erawh nghet tak a la ni bik lo.