Odisha leh Mumbai an inhnehtawk

Indian Super League-ah Pathianni zan khan Mumbai City leh Odisha FC an inkhel a, chak zawk an awm lo - 1-1 in an inhnehtawk a, minute 80-naa Ahmed Jahouh hnawhchhuah vangin Odisha hian kim loin khel zui mah se, an ṭang tlang thei.

Mumbai Football Arena-a inkhelah mikhual team-in goal an khung hmasa zawk a, Fiji captain Roy Krishna chuan kum 37 ni ve tawh mah se, a la chuai lo tih pholangin Mumbai lakah goal hmahruai a khung.

Krishna-a'n tun season-a a goal thumna a khung hian minute 14 chauh a la ni a, Mumbai an hawihai hle. Mahse, mualneitu team hian mikhual lakah tlawm an duh lo - Nikolaos Karelis chuan minute kua hnuah si phurh hi a sut ve leh nghal a, captain Lallianzuala Chhangte siamsak a ni.

Tun season-a goal la khung lo LZa hian goal khung theihna remchang pawh a nei a, mahse, Lunglei tlangval vanneih zan a ni tlat lo. Mumbai tan PN Noufal leh Jon Toral te pawhin chance an nei a, mahse, Odisha keeper Amrinder Singh a ding khawng tlat a, a club hlui lakah goal hnih aia tam a chhuah duh lo.

Mumbai tan hian Lianzuala bakah Hmingthanmawia Ralte (Valpuia) chuan inkhel bul a ṭan a, Odisha tan defender Jerry Lalrinzuala, midfielder K. Lalṭhathanga (Puitea) leh Isak Vanlalruatfela ten bul an ṭan a, bench aṭangin Jerry Mawihmingthanga a lut bawk.

ISL hi Thawhṭanni zan leh Thawhlehni zan an chawl a, October 30, Nilaini zanah khelh ṭan leh tur niin, tun season-a a vawi khat nana chak hlim Hyderabad FC chuan sum hmang na Mohun Bagan an mikhual ang.