A vawi hnih nan Sainz a chak

Pathianni zanlai khan Formula 1 Mexico City Grand Prix tlan a ni a, tun season chhunga a vawi hnih nan Carlos Sainz chuan hnehna a chang a, atan hun chhinchhiah tlak a ni.

Champion lai leh hmahruai mektu Max Verstappen chu vawi hnih hrem a ni a, 10-second penalty vawi hnih pek niin paruknaah a thleng a, nomawi hum a tumna chu a la awlsam dawn rih lo.

Red Bull driver Verstappen-a elpui ber Lando Norris chu pahnihna a ni thung a, driver pahnih inkarah point 47 a la awm, intlansiak vawi khatah point 25 ngawt hmuh theih a nih avangin an dinhmun a la danglam thei dawn a ni.

Lap 10-na an tlan laiin Verstappen hi Norris tana a chet hlauhawm avangin hrem a ni a, a hnuah kawng kawiah tlankawng chhuahsanin awlsam zawka a tlan kual avangin hrem a ni bawk.

Dutch tlangval Verstappen chuan, "Kei chuan eng pawh tawk ila ka beidawng ve ngai lo, a nihna takah chuan intlansiak vawi khata inhrem nan chuan second 20 kha chu a tam lutuk deuh.

"Tun ṭum intlansiaka kan buaina erawh hremna min pek kha a ni ber lo, nidang angin kan team kan tlan chak hleithei lo kha a buaithlak lai chu a ni zawk, engtin nge kan insiamṭhat theih ang tih ngaihtuah chhuah a ngai," a ti.

Season tir lamah khan Verstappen hi a tlan fawr viau a, mahse season chanve an hman hnu aṭangin a che fuh hleithei ta lo. November 3, Pathianni zan hian Autodromo Jose Carlos Pace-ah Brazilian Grand Prix an tlan leh ang.