Khawvela inkhelh thiam ber chu Rodri

Vinicius Junior-a'n khawvela footballer ṭha ber chawimawina, Ballon d'Or a dawng dawn emaw a inti a, khawthlang media zawng zawng pawhin an tarlan dan a ni - mahse, Thawhṭanni zan khan chanchinthar a awm thut a, Vinicius-a'n a dawng dawn lo an ti!

Zan lai a lo thleng a, Lionel Messi leh Cristiano Ronaldo ten an mimal lawmman dawnna dawhkana an tlar dul Ballon d'Or dawngtu chu a chiang ta - a hming chu Rodri a ni a, Manchester City midfielder hi khawvela footballer ṭha ber a ni.

Kum 28 mi Rodri hi kum 1960 hnua Spanish player he award dawng leh thei hmasa ber hi a ni a, kum 2008-a Ronaldo hnua Premier League player zinga he award dawng leh thei hmasa ber a ni bawk.

Rodri hian season hman zawh takah khan City tan Premier League, UEFA Super Cup leh Club World Cup nomawi te a chawi a, Euro 2024-ah Spain a champion pui bawk - a zuitu chu Ballon d'Or a ni.

Spain tan a ni

September-a a khup hliam vanga chawl mek Rodri hian Ballon d'Or dawng tur hian Real Madrid player pahnih Vinicius Jr leh Jude Bellingham te a khum a, Brazilian forward Vini hi pahnihna niin, Bellingham hi pathumna a ni thung.

Rodri chuan, "Kei leh ka chhung te, kan ram tan ni duhawm tak a ni. Vawiin hi keima tana hnehna ni a ni mai lo a, Spanish football tan a ni. Spanish player tam tak, he award phu em em, mahse, dawng ta si lote tan a ni tel.

"Andres Iniesta, Xavi Hernandez, Iker Casillas leh Sergio Busquets bakah, player dang tam tak tan a ni a, hei hi Spanish football leh midfielder nihna pho chhuak ṭhintute tan a ni e," a ti a, Ballon d'Or dawng loa chawl ta player ropuite hming a lam chhuak.

Rodri hi Manchester United legend George Best (1968) leh a hun laia Liverpool fapa rangkachak Michael Owen (2001) hnua England-a khelh laia he award dawng thei pathumna a ni - Ronaldo-a'n United-a season duhawm tak a hman avanga Ballon d'Or a dawn khan Real player a ni tawh.

Football hnehna chu

Ballon d'Or lo dawng tawh ṭhinte hming en ila, tlarhmaa khel player chu a tam zawk an ni a, Messi leh Ronaldo vanglai ngat phei chuan player dang tan hmun a awm lo em ni chu aw, tih mai tur a ni.

Rodri chuan, "Ka ṭhian tam takin lawmpuina thu min thawn a, football tan hnehna ni a nih thu min hrilh - mi tam tak hliahkhuhna kara hna ropui tak thawk ṭhin midfielder te tana êng chhuahtu ka nihna chu hnehna a nih thu min hrilh a ni," a ti.

Spanish midfielder chuan sawi zawmin, "Pa vantlang ve mai, mahni ngaihdan nghet taka nei a, inzir belh reng a, a ṭha lam tihzel tum ṭhin mi ka ni. A tam lam apiang zui mai chi ka ni lo a, chuti chung chuan a sang ber ka thleng thei - hei hi nangmahni vang chauh a ni," a ti a, lawmthu a sawi.

Rodri hian kar khatah £220,000 (Rs. 2,40,18,412) a hlawh mek a, mahse, ama sawi ang ngeiin 'private' taka hun hman duh mi a ni - in man to takah a khawsa lo a, car man to a nei lo a, social media a khawih lo a, a bialnu Laura nena an inkar pawh mipui hriatah pholan a duh ngai lo.

A hun a thleng ta

Kum 2023 khan Manchester City-in treble nomawi an chawi a, inelna pathuma an champion theih nana player thawhhlawk tak Rodri hi Ballon d'Or-ah pangana a ni - kum khat a liam a, dawhsan sang berah a ding ta.

Rodri hian season hman zawh takah khan inelna hrang hrangah match 50 khelin goal kua a khung a, assist vawi 14 a nei bawk - City player pawimawh a ni a, a thiamna hi stastics hmanga sawifiah sen a ni lo.

Euro 2024-a Spain an champion theih nana player thawhhlawk a ni a, final-ah hliam vanga lakchhuah ngai mah se, hemi hma hian hna a thawk ropui tawk hman - Player of the tournament-ah thlan a ni.

Season hman zawh takah khan PFA Team of the Year-ah a lang a, Club World Cup-ah Golden Ball a dawng a, tunah footballer zawng zawng dawn châk Ballon d'Or a dawng leh ta. Spain tan vawi 57 inlana goal li khungtu hi football khawvelin a hre reng tawh ang.