Goal khungtu ropui Kane

Bayern Munich a pan hnuah pawh Harry Kane-a'n champion nomawi chawi thei rih lo mah se, mimal chawimawina erawh a dawn chhunzawm zel a, season khata goal khung hnem ber chawimawina Gerd Muller Trophy chu Kylian Mbappe nen an dawng.

Striker pahnih hian season hman zawh takah khan goal 52 ve ve an khung. Kum 31 mi Kane hian season hman zawh takah khan Bayern tan inelna hrang hrangah match 45 khelin goal 44 a khung a, ram tan goal riat a khung bawk.

Bayern striker Kane hian award hi a hmunah a dawng a, Paris St-Germain striker hlui Mbappe erawh a club khelh mekna Real Madrid an 'tihtauh' avangin a kal ve lo.

Kane chuan, "Bayern Munich-a staff zawng zawng leh ka khelhpuite hnenah, khati zozai goal ka khung theih nana min puih avangin lawmthu ka sawi a ni. Kan club legend Karl-Heinz Rummenigge hnen aṭanga he award ka dawng thei lehzel hi ka tan chuan chawimawina a ni," tiin lawmthu a sawi.