Nistelrooy hoin Man United an inlan dawn

Manchester United chuan zanin dar 1:15 hian League Cup last 16-ah Premier League club Leicester City an mikhual dawn. Old Trafford-ah Erik Ten Hag-a hmel hmuh tur a awm dawn tawh lo a, Red Devils hi club legend Ruud van Nistelrooy-a'n a ho ang.

Foxes hian Man United aiin Premier League nomawi chawi hnuhnung mah se an champion hnuah Championship-ah te an relegate leh tawh a, league-ah pawh point kua hmuin 15-naah an awm mek. Mahse, Man United hnuaiah chiah an awm a, point hnih chauhin an inthlau.

Beisei a sang

Man United-in an result chhiat chhana mawhphurtu lian bera an ngaih Ten Hag an ban tawh a, zanin aṭangin kawng dik zawh chhoh an tum ang. Nistelrooy hian engtin nge team a rem dawn tih hi a hriat a châkawm a, inkhel bul ṭantute pawh danglam hlek tura ngaih a ni.

Chutihrualin hliam vangin Leny Yoro, Tyrell Malacia, Luke Shaw, Jonny Evans, Harry Maguire, Kobbie Mainoo, Mason Mount leh Antony te chu West Ham an hmachhawn ṭumin an inlan thei lo a, Foxes lakah pawh Nistelrooy hian duh thala thlan tur player a nei dawn lo.

Nistelrooy hian PSV a enkawl laiin 4-3-3 formation a hmang a, tlarhnung aṭanga ball la chhuakin mual laiah a luhtir a, mual lai aṭangin winger-te a hmang ṭhin.

Man United hian mual sira player hman theih tur Marcus Rashford, Alejandro Garnacho leh Amad Diallo te a kawl a, chutihrualin tun dinhmunah left wing back dam ṭha a neih loh avangin hna a harsat phah thei thung. A hmawr bawk tur striker Rasmus Hojlund pawhin team chakpui thei turin hmasawn a mamawh viau bawk.

Mahse, Nistelrooy tan chhuanlam a awm thiang lo. Club ṭantute ngainat ni mah se club thuneitute hmin turin hun tam a ngah lo. Foxes lakah hian chak satliah a tawk dawn lo a, game nghet ṭha a pawimawh dawn.

Foxes ve thung

Leicester City hian tun hma an pha tawh lo a, Jamie Vardy pawh kum 37 mi a nih tawh chungin club tan a la pawimawh a, hei hian an dinhmun a sawifiah.

Foxes hian hliam vangin Patson Daka, Jannik Vestegaard, Jakub Stolarczyk leh Hamza Choudhury te an chhawr thei lo a, an match hnuhnung berah Nottingham Forest 3-1 in an hneh lo bawk.

Mahse, Leicester hian Forest laka an tlawm hma hian Bournemouth leh Southampton te an hneh thei a, Old Trafford-ah beiseina sang tak nen an lenglut ang.