Man United-in Amorim an dawr

Manchester United chuan Erik Ten Hag-a thlakna tur an zawng nghal a, Sporting Lisbon manager Ruben Amorim chu Old Trafford-a sengluh an tum. Chutihrualin club leh Portuguese manager te indawrna chin hi a hriat lo thung.

Kum 39 mi Amorim kaihhruaina hnuaiah Sporting-in Portuguese league title vawi hnih an chawi tawh. Thawhṭanni khan Amorim chuan, "Man United lam zawhna zawh hi ka ring sa a, mahse a chhanna tur erawh ka nei lo," tiin sawi zau a tum lo.

Man United chuan team enkawl lailawk tura an ruat Ruud van Nistelrooy chu League Cup chungchangah media an hmachhawn tir lo a, Dutch manager hi manager nghet tur atana an duh ber niin a lang lo.

Chutihrualin Amorim hi Sporting aṭanga lakchhuah hi a awlsam dawn lo. Sporting hian Amorim lalut tur hian kum 2020 khan Braga hnen euro 10mtd (£8.3m) an pe a, Man United pawhin Amorim hi an la chhuak a nih chuan hetiang zat vel bawk hi zângnadawm nan an pek a ṭul dawn.

Amorim hian June 2026 thleng contract a nei a, April thla khan West Ham zawm châkin London club nen indawrna a neihpui a, inremna an nei thei ta lo. Mahse, Portuguese manager hian Sporting chungah ngaihdam a dil.

Liverpool pawhin Amorim hi an dawr angin sawi bawk mah se khawtlang media te chuan Reds-in Arne Slot an thlang hrim hrim niin an tarlang. Hammers pawhin David Moyes thlak nan Julen Lopetegui an la leh ta zawk a, Premier League club pahnih duh loh tia sawi theih dan a awm.

Man United hi duh thlang thei dinhmunah an ding em tih hi zawhna a ni a, club pahnihin an hnawl avangin Amorim hi a ṭha lo tihna a awm chuang lo. Kum 19 hnuah Sporting Lisbon chu league nomawi a chawipui thei a, Man United league nomawi chawi lohna pawh kum 10 chuang a liam tawh avangin Amorim chunga beiseina an nei hi thil mak a ni hran lo.