October 31-ah Tour de Hmuifang 2024

Mizoram Cycling Association leh Tourism Department ṭangkawpin an buatsaih - Tour de Hmuifang 2024 chu October 31, Ningani hian a neih dawn. Vanapa Hall kawt aṭangin Tourism minister Lalrinpuiin a vai liam ang a, tlan kawng tawp, Hmuifang ah kharna hun hman a ni ang.

TDH24-ah hian Thirsakawr khalha intlansiak turin mi 48 in hming an pe a; inelna hi Master, Elite, Junior, Road leh Women category-ah ṭhen a ni. Intihsiakna rothap leh kawng thui ber tur elite category-ah mi 11 an inel dawn a, Mizo tlangval Mesak Vanlalvena elpui turin India rama rider ṭha Ronel Singh leh Adonis Tangpu bakah Meghalaya aṭanga rider ṭha Kevin John te tel tur hian ngaihven a hlawh phah.

Ronel Singh hi 2024 NATIONAL MTB U-23-a champion lai a ni a, nikum 2023 khan Asian Championship-ah India aiawh a telin pakuana a ni phak. 2023 MTB TAWANG-ah elite gold medalist a nih bakah North East Olympic 2022 khan elite gold medalist a ni bawk.

Adonis Tangpu hi 2020 Asian Mountain Bike Championship, Chiang Rai, Thailand-ah Junior category 6-na a ni tawh a, 2022: UCI Velo Alanya MTB CUP XCC, Alanya, Turkey-ah 13-na niin 2022 Asian Mountain Bike Championship, Suncheon, South Korea-ah khan 13-na a ni bawk. 2024 Asian Mountain Bike Championship, Malaysia a neihah 16-na ni phakin 2024 20th National MTB Championship, Panchkula, Haryana a neihah khan Elite XCT ah bronze lain XCO-ah Silver medal a la bawk.

Mesak Vanlalvena, Sihfa khawchhuak hi Mizo cyclist ṭha bera chhal theih a ni. Mizorama intihsiakna a tel tawhna zawng zawngah lallukhum a khum fai vek a, hei mai bakah hian 2022 MTB EKARIKTHIN -ah silver medal lain 2023 MTB MOOPIN 3.00ah gold medal a la. Tour de Hmuifang-ah hian champion lai a ni.

Master Category hi kum 35 chin chunglam inelna tur a ni a, mi 15 an in el dawn. MiCA-in ṭan an lak mekna Road Bike Category-ah (thirsakawr ke sin zit zet chi) mi panga an inel dawn a, Junior Category-ah mi 15 an in el dawn bawk.