Mizoram lakah Manipur an zawr

Board of Control for Cricket in India (BCCI) hnuaia inelna, state hrang hrang inelna sang Ranji Trophy 2024 khelh laiah Mizoram chuan nimin khan Manipur chu innings khat leh run 20 zetin an sawp.

Inelna hi GS Patel Stadium, Gujarat-ah khelh niin, tournament a match te hi ni khat aia rei khelh chi (multi days format) niin, ni hnuhnung ber (day 4-ah) Mizoram Team te’n Manipur team hi run 246 an siamah an vawm out vek a ni.

Innings pahniha Manipur run siam belh khawmn chu run 516 a ni, innings hmasa zawkah run 270 an siam. Mizoramin thawh khatnaa an run siam an phak lohna hi run 20 lai a la ni a; hei vang hian Mizoram hi bat ve ngai loin hneh takin, run 20 leh inning khatin an chak.

Cricket Association of Mizoram (CAM) team tan hian guest player Agni Chopa chuan ball 269 a hmachhawn aṭangin run 218 a siam a, a phu ang ngeiin man of the match atana thlan a ni.

Ranji Trophy khelh laiah Mizoram te hi plate Group ah awmin – Goa, Nagaland, Sikkim, Manipur leh Arunachal Pradesh te nen an awm ho a, vawi 3 khelhah vawi 2 chakin, khelh hmabak match pahnih an la nei bawk.

November 6-9 chhungin Mizoram hian Ahmedabad-ah Goa an hmachhawn leh dawn a, chumi hnuah Nagaland chu Nadiad-ah an tum leh bawk ang. Mizoram hian point 13 an hmu tawh a, an hmachhawn leh tur team pahnih te nen an point a inzat avangin a pawimawh dawn hle.

Cricket Association of Mizoram chuan nimin khan thuchhuah an siam a, Mizoram mipa senior team - player leh supporting staff zawng zawng chungah lawmthu an sawiin, an chhuang takzet, an khelh leh turah pawh duhsakna sang ber an hlan bawk a ni.