Norris tan inthlak danglam a ngai lo - McLaren

Formula 1 driver champion nih tuma inum chuan a vawrtawp a thleng chho mek a, pahnihna dinhmun luahtu Lando Norris chuan thapui a thawh - a team McLaren chuan inthlakdanglam kher lo in, tuna an kal dan pangngaia kal an duh tih an sawi.

Season tir lam kha chuan Red Bull leh Max Verstappen te chu midang tana cho ngam loh khawpin an kalfawr, mahse tun hnaiah erawh McLaren leh Norris te hian an chhaih buai hneh hle.

McLaren team boss Andrea Stella chuan, "Ka mimal ngaihdan chauh a ni lo a, team lamin ngun taka kan ngaihtuah bakah kan sawi ho bawk, tunah chuan Lando hian a hna a thawk ṭha tawk.

"Season kan hman chhoh dan kan thlir kir a, tun aia ṭha zawka tih dan chu a awm ngei ang. Chutihrualin, tunah hian inelna a la zo lo a, a ṭha ber ni thei dinhmunah kan la ding, kan dinna leh kalphung ngai hi a ṭha," tiin a sawi.

Norris hian champion-ship hmahruaitu Verstappen hi point 47-in a phak lo mek, car intlansiakna sang ber hi tun season atan inelna hmabak pali an la awm. November 3, Pathianni zanah Brazilian Grand Prix an tlan leh ang.