Pro Fight-ah boxer 280 an tel dawn

Zudio LPS Pro Fight tel tuma hming thehlut te chu an hriselna endik a ni a, buk nghal an ni bawk. Thawhṭanni khan endikna hi neih niin tualchhung boxing inelna ngaihhlut hmachhawn turin boxer 280 an tling, inelna hmachhawn tuma hming pelut zinga mi 40 erawh an inlan ve ta lo.

Pr Fight-ah hian champion tawh - HC Lalramfela, C. Lalduhawma leh Lalrinngheta ten a tir aṭangin inelna an hmachhawn dawn a ni.

Inelna buatsaihtu lamain nikum aia boxer tel an tam an beisei laiin, kuminah pakhatin an tlem ta zawk. Hetih lai hian boxing khel ngai lo leh vawi khat telna erawh kum dang aiin an tlem a, tunlaia Mizo boxer ṭha leh beiseiawm, Pro Fight-a la inlan ngai lo eng emaw zat an tel ve thung a, inhnek hmuhnawm leh inelna sang leh zual a nih ngei a buatsaihtute chuan an beisei a ni.

Weight hrang pang zingah fly-a tel an tam ber a, NT Lalbiakkima kalsan champion kawnghren changtu nih tumin boxer 89 an inbuk a; bantam champion lai Laldinsanga title chhuhsak tumin boxer 66 an inziak lut ve thung.

Light-ah champion thar nih tumin mi 65 an tel a, welter champion Lalruatzela Hauzel cho theitu nih tumin mi 37 an inel dawn a, weight hrang panga zinga tel an tlemna ber middle-ah niin, C. Lalhruaitluanga kut aṭanga champion kawnghren chhuhsak tumin boxer 23 an inbuk a ni.

Pro Fight huanga weight hrang pathuma champion hmasa ber nih tumin Ramfela'n light title kalsanin welter-ah chona thar a hmachhawn dawn a, middle title lak kir leh tumin 2019 champion Duhawma a tel bawk a, kum nga hnua Pro Fight-a a inlan leh hmasak ber tur a ni nghal dawn a ni.

Kum 2022 bantam weight champion Rinngheta'n nikum ang bawkin light title a chuh leh dawn a, kum kal ta khan title kalsanin weight rit zawkah a insawn a, semifinal a pal tlang zo ta lo a ni.

Nikum Title Fight-a chak zo ta lo Ramdinthara, Lalhruaitluanga, Vanlalenkawltira leh Lalthanliana Junior te inbuk zingah an tel a, Mizoram chhung bakah Myanmar, Manipur, Meghalaya leh Assam aṭangin an tel bawk a ni.

Vawiinah fixture tih chhuah tur niin, ruahman dan chuan Zirtawpni zan dar 8:00 aṭangin LPS Arena, Falkland-ah an inhnek ṭan dawn a ni.