Harsa takin Tsitsipas a chak

Paris Masters 1000 khelh ṭan a ni a, champion tura rinkai zinga mi Stefanos Tsitsipas chuan a match hmasa berah fiahna a hmachhawn nghal, a khingpui Roberto Carballes Baena a hneh hram.

Thawhṭanni zan inkhelah Greek tlangval Tsitsipas hian set a hloh hmasa, mahse huaisen taka bei letin a tawpah 4-6, 6-3, 6-3 in a chak a, season tawpa khelh tur ATP Finals atan beisei a nei chhunzawm.

Tun hnai season hnih chhung chu Tsitsipas hian Paris Masters-ah hian semifinal a thleng, tun dinhmunah world number 11 niin a thiam zual pariat inelna hmachhawn thei tur chuan tun ṭumah hian a thlen san a ngai dawn.

Kum 26 mi Tsitsipas chuan, "Match tir lamah khan ka pum na vangin ngai ka awh lo, chuvangin ka tan inkhelh kha a harsa. A hnuah erawh ka zia hret a, duh ang thlap ni lo mah se ka chak hram avangin ka lawm," a ti.

ATP Finals la beisei ve zinga mi Tommy Paul erawh Adrian Mannarino lakah 6-3, 7-5 in a chak lo a, American tlangval tan Turin khawpuia inlan beiseina a tawp chhunzawm ve nghal bawk.

Inkhel dangah tualchhung player Hugo Humbert chuan darkar hnih chuang an inkhelh hnuah, world number 35 Brandon Nakashima chu 6-3, 4-6, 6-4 a hnehin round sang zawk a inhlangkai ve ta bawk a ni.

Tun ṭumah hian Paris Masters champion lai Novak Djokovic chu a inlan ve lo. Serbian star hi ATP Finals atan chuan a tling tawh tho, ani bakah hian Jannik Sinner, Carlos Alcaraz, Alexander Zverev leh Daniil Medvedev te an tling tawh bawk.