Team phur thar Hyderabad inlan dawn

Tun season ISL-ah Hyderabad-in vawi khat chiah chak an la nei a, an chak awmchhun hi an match hnuhnung bera 4-0 ngawta Mohammedan SC an hneh chu a ni - an phur vanglai tak a ni.

Manipur coach Thangboi Singto enkawl Hyderabad hian zanin dar 7:30-ah Mohun Bagan an mikhual dawn a, Kolkata club hian an match hnuhnung pahnihah goal nga khungin, an lamah goal a lut miah lo.

Nipui transfer-a sum hmang na tak Bagan hian match ngaah vawi thum hnehna changin, vawi khat chiah an la tlawm a, vawi khat draw an nei - an result thlirin Hyderabad lakah chak an tum ang.

Bagan hian Mizo player Lalengmawia Ralte (Apuia) an kawl a, Hyderabad hian goalkeeper Lalbiakhlua Jongte, defender Laldanmawia, midfielder Isaac Vanmalsawma, Lalchhanhima Sailo leh forward Ramhlunchhunga leh Aron Vanlalrinchhana te an kawl.