Tottenham khelmualah Man City

English League Cup last 16 chu zanin hian khelh a ni dawn, dar 1:45-ah Tottenham Hotspur chuan Premier League champion an lo mikhual ang, inkhel a hmuhnawm dawn.

Premier League team ten pawisa an ngah tlang tawh a, chuvangin tun hma anga player duhlai inchhuhsak kha a harsa tawh. EPL mai bakah FA Cup leh League Cup ten ngaihhlut a hlawh zual, eng inelna pawh ni se champion an châk ṭhin.

Zanin inkhel tura sawi hlawh chu Pedro Porro a ni. Kum 2019-2022 chhung khan Porro hian Etihad Stadium-ah hun a lo hmang tawh a, mahse a khel phak ngai lo - khelh phakna zawngin Sporting a zawm.

Portuguese club aṭangin Spurs hi a zawm a, a man zat chu pound maktaduai 40 a tling daih tawh - nasa takin a intuaihriam tih a chiang a, tun hma lama Man City tana a khelh phak loh ang ngawt kha chu a ni tawh lo tih a chiang bawk.

Ange Postecoglou kaihhruaina hnuaiah Porro hian North London club tan hmun pawimawh a chang a, zaninah pawh a club hlui laka harsatna siamsaktu nih chu a thil chak a ni dawn, coach Pep Guardiola tan a ven dan tur ngaihtuah a ngai thung ta zawk a ni.

Zanin dar 1:15 tho hian Arsenal chu Preston khelmualah an lenglut dawn - Preston hi Championship club an ni a, Mikel Arteta-a'n a player ṭha zawng zawng a chhawrin a rinawm loh a, indahṭhat theihna remchang a ni ang.

Gunners hi Liverpool nena inhnehtawk hlim kha an ni a, tun kar tawpah Newcastle United an tlawh zui dawn bakah Champions League-ah Inter Milan an tum zui dawn a, chumi hnua an hmabak chu Chelsea a ni leh dawn - player siksawi thiam a ngai dawn hle.