A hliam a thup vangin Pacquiao an khing

Nevada Athletic Commi­ssion (NAC) chuan Filipino boxer Manny Pacquiao chu a dar hliam chungchanga dawt sawiah puhin hremna hmachhawn thei dinhmunah a ding mek. NAC thuchhuak chuan inhnek hmaa questionnaire an siamah Pacman chuan hliam nei lo angin a inziak niin an sawi a ni.

Pacquiao hi Nevada khaw­chhuak pahnih Ste­phane Vanel leh Kami Rahbaran te chuan court-ah an khing bawk a, dollar maktaduai nga chawi turin an phut. An khin chhan an sawiah chuan mi tam takin inhnek ropui leh hmuhnawm hmuh beiseiin manto takin ticket an lei a, Pacquiao hian mipui bumin a dar hliam zep chungin inhnek a hmachhawn a ni, an ti.

NAC-in Pacquiao an puhnaah hian Pacman hi dik lo zawka ngaih a nih chuan 'dawt sawi leh thudik thup' vangin kum khat leh kum li inkar jail tan bakah $5,000 (Rs 3,17,575) thleng chawi tura hrem a ni ang.

Pathianni liamta a Mayweather nen an inhnek zawh khan Pacquiao chuan a dar hliam vanga a hnek ṭhat theih loh thu leh beisei a phak loh thu a lo sawi tawh a ni. Team Pacquiao leh a promoter Top Rank chuan thuchhuah siam ve nghalin Pacman-a hliam chungchangah hian United States Anti-Doping Agency hnenah training camp an neih lai leh fight thlen hmain an in report vek thu an sawi a, USADA doctor-in taksa tihchakna tel lo leh na chhawk thei damdawi hmanga jection inhnek hmaa la tura a chawh chu NAC lamin an hnawl sak thu an sawi bawk.

Team Pacquiao leh Top Rank thuchhuak chuan, "NAC thuchhuak hian minti lawm lo hle a ni. Team Pacquiao chuan USADA hnenah kan hliam chungchang kan thlen vek a, damdawi pawh chawh kan ni nghe nghe. Manny Pacquiao hian an inhnek hma a medical form-ah pawh damdawi chawh a nih chungchang hi a ziak lang vek a ni," an ti.

NAC erawh an thu­chhuahah hian an ṭang na hle a, NAC executive director Bob Bennett chuan, "Questionnaire kan pek kha a chhang ṭha lo mai a ni lo a, a rinawm lo a ni," tiin Pacquiao chu a chhuah chhe hle.

Bennett chuan, "Inhnek turin darkar hnih chauh a awm tawh tihah khan nachhawkna lak an duh thu an rawn thlen a, khatiang hun tep ter tawh takah khan keini lam tan chuan tihngaihna a awm lo a ni," a ti.

Pacquiao enkawltu Surgeon Neal ElAttrache chuan Filipino boxer hi a dar hliam vanga zai a ngaih thu a lo sawi tawh a, a sawi anga an zai a nih chuan thla kua aṭanga thla 12 thleng chu a chawlh a ngai dawn a ni. September thlaa vawi khat a inhnek leh hnua chawl tawh mai tur anga insawi Mayweather nen rematch-na chance a chhe lehzual ta hle.