Qatar World Cup Documentary siamtu journalist an man
Kum 2022-a Qatar-in World Cup a thlen tur chungchangah a ṭha lo zawngin chanchinthar an nei leh tawh a, World Cup thlenna tur stadium sak nana ram pawn lam mi an chhawrte an chhawr dan chungchang documentary siamtu German journalist te chu man an ni.
Qatar hi World Cup stadium sak nana ram pawn lam mite an chhawr danah an lo mualpho tawh hle a, hemi chungchang documentary film a siam an hua pawh hi a awm lo hran lo.
Germany a television channel ARD thawktu te hi March khan man an lo ni tawh a, tunhnaiah he thil thleng hi media lamah a darchhuak ve chauh a ni.
Qatari official te chuan he thuthang hi pha in documentary siam ngawr ngawr chu an phal lo nilo in journalist an man te chuan phalna la hmasa lova documentary film an lo siam vanga man an nih zawk thu a sawi.
Journalist an man zinga mi reporter Florian Bauer chuan, "Tunah chuan puanzar a ni ta. Qatar-ah khan man kan tawk ngei a, police leh intelligence service te'n thu min zawtfiah a, ni engemaw zah chhung chu Qatar chhuahsan min phalsak lo a ni," a ti.
Qatar Supreme Committee chuan, "Journalist Qatar-a lut tur reng reng tan phalna nei hmasa lo chuan Qatar ram chhung khawi hmunah pawh film siam phal a ni lo," tih hriat phah nan hmang rawh se tiin thuchhuah an siam ve nghal a ni.
ARD staff te hi ni nga hnuah an bungrua tel lo in Qatar chhuahsan phalsak an ni a, kar li hnuah an bungrua hi thawn leh niin documentary film an siam zawng zawng chu paih bo sak vek an ni. ARD channel-in documentary film an siam hi 'Sold Football - Sepp Blatter and the power of FIFA' tih a ni.