Bharat FC lakah Mohun Bagan an tlawm

I League champion tum Mohun Bagan-in Shree Shiv Chhatrapati Sports Complex, Pune-ah Bharat FC an hneh lo a, hmahruaina an belhchhah thei lo.

Thawhlehni zan inkhelah Indian Super League-a Mumbai City forward Subhash Singh-a'n minute 34-naah goal awmchhun a khung a, Mohun Bagan-in an si phurh sut tumin minute 59-naah Jeje Lalpekhlua an luh tir a, Hnathial tlang­valin mamawh goal a luh pui lo. 1-0 in inkhel a tawp.

Mohun Bagan hian season bul ṭan ṭha mah se match hnuhnung parukah point riat chiah an hlawhchhuak a, hei vang hian khelh zat inangah Bengaluru FC aiin point khat chauhin an sang zawk. Team pahnih hian match li ve ve an la khel dawn a, I League season tawp boruak a nung ṭha khawp ang.

Kolkata Club = Nil

I League hi 2007-08 season aṭangin khelh ṭan a ni a, India ram football-a sulhnu nei ṭha Kolkata club an la champion lo. Mohun Bagan leh East Bengal te awmna Kolkata club-in Goan club te an tluk lo. Nikum season khan Bengaluru FC an champion a, a bak season ruk chu Goan club-in an hui fai vek.

Tuna hmahruai mektu Bagan hian Sporting de Goa vawi hnih an la khel dawn a, Royal Wahingdoh leh Bengaluru te an la hmachhawn dawn bawk. Champion lai Bengaluru-in Shillong Lajong, Salgaocar, Dempo leh Mohun Bagan an la khel dawn.

Season kharnaa Mo­hun Bagan leh Bengaluru FC khel tur hi I League champion zawnna tur niin a lang a, champion turin Kolkata club dinhmun a la ṭha bik lo.

Season Champions

2007-08 Dempo

2008-09 Churchill Brothers

2009-10 Dempo

2010-11 Salgaocar

2011-12 Dempo

2012-13 Churchill Brothers

2013-14 Bengaluru FC