Europa League naupang zawk enchhin nan - Rodgers

Liverpool manager Brendan Rodgers chuan season thara Europa League an khelh chuan naupang zawkte khelhna chance pek a tum thu a sawi.

Reds hian players naupang la ṭha chho tura beisei an kawl hnem hle a, player langsar zingah U21 player Jordan Williams leh Jordan Rossiter te chu Capital One Cup-ah inlan tawhin U21 captain Cameron Brannagan chu tunhnai khan first team squad-ah telh a ni bawk.

Brendan Rodgers chuan, "Liverpool kan enkawl hmasak ber ṭum khan Europa League-ah player la naupang tak tak Raheem Sterling, Andre Wisdom leh Suso te kha kan khelhtir a, group-ah hmahruaitu niin point 10 kan hmu thei a ni. Season tharah pawh Europa League kan khel a nih chuan player naupang zawkte chher hriam nan kan hmang ang," a ti.

Barclays Under 21 Premier League-a Everton nen an inkhelh ṭuma goal hnih khungtu Ryan Kent chungchang sawilangin Rodgers chuan, "Kum 18 leka upa ni chungin Ryan hi a puitling em em a, hma a sawn chakin pla­yer beiseiawm tak a ni," tiin a fak.

Liverpool hi Premier Lea­gue-ah pangana ni mekin an chung chiaha awm Manchester United an phak lohna hi point li niin match thum chiah khelh tur an nei tawh a, season thara Champions League khel tur chuan an game hmabaka chak chhoh vek bakah Manchester United chetsual an chan a ngai tawh dawn a ni.

Liverpool hian Premier League champion Chelsea an la hmachhawn dawn bawk.