Mourinho-a'n contract thar a hnaih
Chelsea boss Jose Mourinho-a'n Premier League title pathum a lak hnuah contract thar ziah a hnaih hle.
Kum 52-a upa Mourinho hian kum 2013 khan Stamford Bridge-ah a kir a, kum li daih contract ziakin tunah hian a chanve a hmang chho leh der tawh.
Tunkar chho hian Portuguese manager leh club an inbia anga, Mourinho hian a contract a pawhsei ngei rin a ni.
Mourinho hian kum 2004 leh 2007 inkar khan Chelsea a lo enkawl tawh a, khami ṭum khan Premier League title pahnih a lo la tawh. Kum 2005-a an champion kha Chelsea-in kum 50 hnua English league sang bera an champion leh vawi khatna a ni. Premier League nomawi bakah hian FA Cup (1) leh League Cup (2)-ah te an champion bawk.
Chelsea aṭanga a chhuah chhan kha club neitu Roman Abramovich nena inhmuhthiam loh vang a ni a, tunah erawh an boruak a ṭha leh tawh hle.
Mourinho chuan, "Season tira ka sawi ang khan Abramovich-a'n cham tura min tih chhung chu helai hmunah hian ka awm ang. Kal tura min tih hunah chuan ka kal mai ang," tiin a sawi.
Portuguese coach hian Porto leh Inter Milan te Champions League-ah a champion pui tawh a, Europe inelna sang bera Chelsea champion pui hi a hmabak a ni.