Europa League Napoli leh Sevilla an inlan dawn
Zaninah Europa League semi-final first leg an khel dawn a, Italian club Napoli leh Fiorentina an inlan dawn bakah champion lai Sevilla leh Ukrainian club Dnipro te an inlan bawk ang.
Semi-final pahnih hi zanin dar 12:35 ve ve a inkhel tur niin Napoli-in an khelmualah Dnipro Dnipropetrovsk an lo mikhual anga, Spanish club Sevilla in Fiorentina an lo mikhual thung dawn a ni.
A vawikhat nana final khelh tum
Italian club Napoli leh Dnipro Dnipropetrovsk te hi Eurpoa League final a la inlan ngai lo ve ve an ni a, a vawikhat nana Europe club inelna sang ber dawttu final boruak tem hi an chak viauin a rinawm.
Rafael Benitez-a enkawl Napoli hi Europa League team hmuhnawm ber pawl an ni. Semi final lut tur hian quarter final inkhelh belhkhawmah German club ṭha leh hmuhnawm Wolfsburg 6-3 a sawp thei an ni a, an chhe lo. Season thara Champions League khelh an duh anih chuan an tan Europa League-a champion a pawimawh lehzual dawn. Serie A-ah palina an ni mek a, Champions League khel phak turin pathumna tal nih a ngaih avangin champion team apiangin Champions League an khelh ṭhinna Europa League-a champion hi an tum khawp ang.
Napoli hian Europa League bikah goal 25 an thun tawh a, anni aia thun hnem an awm lo. An tlar hma lama Jose Callejon, Marek Hamsik, Lorenzo Insigne leh Gonzalo Higuain te ho inkawp hi Dnipro tlarhnung tan chuan mut ti tui lo tham an ni ang.
Ukrainian club Dnipro hian semi-final lut turin Belgian club ṭha Club Brugge chu quarter final-ah 1-0 in an hneh a, an game hnuhnung 11-ah vawi khat chiah an la tlawm avangin inrintawkna nasa tak nen Napoli khelmual Stadio San Paolo-ah an lenglut thei ang.
Europe competition-a an semi-final hmasa ber khel tur Dnipro hi tunhnaia Europe-a khualmuala vawi riat an fehchhuahah vawi khat chiah an la chak a, zanina Napoli khelmuala chak tur chuan an beih ve viau a ngai dawn a ni.
Benitez-a thukhawchang
Napoli manager Rafael Benitez chuan, "Final luh ngei hi kan tan chuan a pawimawh em em a ni. Dnipro hian club ṭha tak an nihzia an lo tilang tawh a, Europe a club langsar ni phak ṭhiau Olympiakos, Ajax leh Club Brugge te an semi-final kalkawngah an hneh thei a, an chhe lo. Mahse, ka player te khelh dan leh training naa an thawhrim dan te ka hmuhin kan chak ngei ka ring a ni," a ti.
Champion lai Sevilla khelmualah Fiorentina
Zaninah Italian club pahnih an inlan dawn a, mipui rinkai loh zawk Fiorentina-in Spanish club Sevilla khelmual an pan dawn.
Sevilla hi an khelmual Ramon Sanchez Pizjuan-ah chuan Europe a club huphurhawm ber pawl an ni. An khelmuala game 35 chhung hneh loh an tawn tawh loh hnuin an record duhawm tak hi Real Madrid-in kar hmasa lawk khan an thaichhe thei hram a, 3-2 in Madrid khaw club lakah hian an tlawm. Mahse, Sevilla hi hnual tur an ni lo. Europe bika an 'home form' hi chhuan tham a ni tlat, vawi riat chhung chu a zawnin an mikhual team lakah an tlawm tawh lo a, Europe a semi-final vawi thum an khelh tawhah final an la inhlangkai vek a ni.
'La Viola' tia hming an vuahsak Fiorentina hi dah hniam ngawt thei an ni bik lo, an khingpui tur Sevilla-in an khelmual an hman thiam em em laiin khualmuala chak harsat lo tak an ni thung. Europe competition-a an khualmual match hnuhnung vawi 12-ah Fiorentina te hian tlawm hmel an la hmu lo a, 2010 Champions League-a Bayern Munich nen an inkhelh hnu khan khualmualah an la tlawm miah lo tihna a ni.
Semi final lut tura an team hneh te hi Tottenham Hotspur, AS Roma leh Dynamo Kiev te an nih nawk avangin team tum chakawm tak an ni hran lo. Fiorentina hian Europe-a semi final vawi ruk an khelh tawhah vawi li a tlang zawkah an ṭang tawh bawk.
Chak tum Fiorentina
Fiorentina boss Vincenzo Montella chuan, "Sevilla leh Real Madrid inkhel kha ka en a, Sevilla kha team ṭha tak an nih zia ka hmu. An thawhhona a ṭha a, an in man em em bawk. Mahse, keini pawh team ṭha tak ve tho kan nih avangin chak ngei kan tum dawn a, chak ngei kan inbeisei bawk a ni,"a ti.